Waşîngtin ancîya (onca) bi (ebe) Erebîstanê Seûdî ra planê rotişê çekan keno. Na ray erebî seba 60 mîlyarî Dollarî jet û helîkopteranê cengî herînenê.

Weçînitişê serekkomar Obamayî ra tepîya reya verên a ke Amerîka de îhracatêde henî girs ê çekan ame kerdene. Pêro pîya bi (ebe) erjaya xo yê 60 mîlyar Dollarî Amerîka rekorê xo şikna. Na game ra Erebîstanê Seûdî jet û helîkopterê cengî yê tewr modernî herîneno. 60 mîlyaran ra erebî wazenê ke bi juna (yewna) butçeyê 30 mîlyarî artêşa xo ya derya modernîze bikerê. Dima kî planê Amerîka ra gore erebî roketê taybetî yê seveknayîşî biherînê.

Xebera rojnameya Wall Street Journalî ra gore siparişê Erebîstanê Seûdî fîrmaya teyarayan Boeing de 77.000 karkeran rê kar ano. Sirf Boeîng ereban rê 84 jetanê F-15 û 70 teneyî kî helîkopteranê Apacheyî roşeno. Hetê ra kî 36 teneyî helîkopterê qijkekî yê tîpê Little Bird kî yenê rotene. Şîrketo bîn ê çekan Sikorsky kî Erebîstanê Seûdî rê 72 helîkopteranê Black-Hawkî roşeno. Vetiş û rotişê nê çekan mabênê 5-10 serrann de yeno ra hurendî (ca).

Raver ra gerek ke no rotişê çekan kongreya Amerîka de bêro qebul kerdene. Obama ceribneno ke endamê kongre no qerar bivejê, çike ekonomîya xirabe ke Amerîka no taw tede r’ a, tîcaretêde nîyanên keno muhîm, Obama vano. Qesawetê Îsraîlî herînayîşê nê çekan ser o kî ame hel kerdene. Jetan de ke şonê Erebîstanî, fuzeyê bi menzîlo durî nêamey pakerdene. Aye ra kî dot Îsraîl bi xo wazeno ke jetanê daha rindan ê F-35 biherîno.

Amerîka îhracatê çekan de dinya de cayo 1. der a. Para Amerîka pîyaseya çekan de 39% a, yê Rûsya 18% û yê Fransa 13% ya.

Vetoxê çekan îman kenê ke eke Îran planê xo yê roketan de raver şêro, welatê bînî yê Rojhelatê Mîyanênî mecburî xeylê çekanê neweyan herînenê. No ters ser o Mîreyîyê Ereban newe ra seba 7 mîlyarî Dollarî sîstemê roketan ê seveknayîşî varyantê “Thread System” (Sîstemê Tehdîdî) herîna. Erebîstanê Seûdî kî herînayîşê nê sîstemî de eleqe musneno.