Die Zeit: Problemê CHP kemalîst ê

0
223

Rojnameyê almanî Die Zeit roja weçînitişan ra ver derheqê serekê partîya CHP Kemal Kiliçdarogluyî de ju (yew) meqale neşr kerd. Tede hem karakterê Kiliçdarogluyî hem kî problemê partîya CHP ser o nusîno.

Yeno nuştene ke badê ke sereko verên Denîz Baykal vîdeoyê seksî de ame dîyene, serekîye kote Kiliçdarogluyî. Kiliçdaroglu eksê Baykalî de merdimêde (mordemêde) pak o ke şarperwer û zerrîveşaye aseno. “Kilçdaroglu, merdimê (mordemê) şarî, hurendîya (herinda) metresan de virare fîno karker, kurd û feqiran ra. O kayê kay keno ke xeylê wext Tirkîya de nêvejîya sahne: mizgîndayîşo sosyal-demokrat.” Yeno vatene ke Kiliçdaroglu kurd o û Dêrsim ra çêyêde (keyeyêde) girs ra yeno. Die Zeit wendoxanê xo rê îzeh keno ke binê hukmatê kemalîstan de Dêrsim de qirkerdişêde gonin ca girewto.

Fikrê nuştoxê meqale ra gore Kiliçdaroglu ceribneno ke partîya xo bivurno û tayê heqan bido kurdan. “No seba partîya CHP kî jê (sey) şoreş o. Partîya ke vîst serranê peyênan de ne zaf sosyale ne kî hende demokratîke bîya. Partîya ke duştê her tawizê kurdan de vejîyaya mahkeme ver û ke xo binê sitara eskerîye de xelisna – tersê şarê dîndarî ra.”

Yeno vatene ke xeylê pispor, sîyasetkar û kî endamê partî guman kenê Kiliçdaroglu besebikero partîya xo bivurno. Endamêde anonîm ê CHP hetê ra vano ke Kiliçdarogluyî xeylê weçînitoxê CHP ê kanî tersnay, heto bîn ra kî Tarhan Erdem, sermîyanê enstîtuyêde cigêrayîşî, vano ke “Kiliçdaroglu zehmet nêkeno ke perro nasyonalîst ê CHP ra raxelisîyo.”

Naye ra nimûne, lîsteyê namzedanê CHP de kî tayê neteweperwerê tirkî estbî ke no taw duştê înan de dewayî amey rakerdene. Mîsal, namzedê CHP ê Anqara Sînan Aygun ke bêçikê xo kiştişê mîsyoneranê xirîstîyanan ê serra 2007 Meletî de estê. “Tayê serran ra ver Aygunî îqaz kerd ke ‘Tikrîya hetê mîsyoneran ra yena hêriş kerdene. Ê dîn jê (sey) çeke xebitnenê.’ Namzedîya Aygunî de problemê CHP jê (sey) peynîya nedîyar a nasyonalîstîya tirkan bellî benê. Nê neteweperweran da-100 serran ra ver duştê armenî û yunanan de daybî pêro – heta jenosîd û surgunkerdiş. Heta nika kemalîstî eleqedarîya armenî û yunanan ra zehmetîye ancenê (oncenê). (…) Înan serehuşk sîyasetê rakerdişî yê AKP duştê Armenîstan û Yunanîstanî de betal kerd. ‘Ma Aygun semedê taybetmenîya xoya meslegî ra kerd namzed’, Kiliçdaroglu vano. La, pê Aygunî do se bikero, gerek naye hîna îzeh bikero.”