Qazî Mihemed (Qazî Mohamed), serrgêra 67. ya dardekerdişê xo de, Hewlêr de yew semîner de ame yad kerdene.
Serekkomaro verên û tek ê Komara Kurd a Mehabadî Qazî Mihemed serrgêra 67. ya dardekerdişê xo de hetê temsîlkaranê partîyanê sîyasîyan ra ame yad kerdene. Semînerê yadkerdişî ke hetê Partîya Demokrat a Kurdîstanî ya Îranî (KDP-Î) ra ame organîze kerdene, şaristanê Hewlêrî de ca girewt. Partîyê KCK, KDP, YNK, PYD û xeylê rêxistinê bînî tey temsîl bîy. Semînerî bi vindetişê rêzîye dest kerd ci, dima sekreterê pêroyî yê KDP-Î Xalît Azîzî qisey kerd va, “Dardekerdişê Qazî Mihemedî ra ver xeylê rayî seba xelisnayîşê ey estbîy. La seba ke sazkerdoxanê komara kurdan ra yew bî û seba ke alaya kurdan hewa naye (…), ey bi şehadetê xo keyberê pêro têkoşeranê azadî û mucadeleyê kurdî kerd ra. Sey netîce kî her çar parçeyê Kurdîstanî de game bi game mucadeleyê azadî yê kurdan şî raver.”
Semîner de pêro qiseykerdoxan da giranîye ser ke bi nimûneyê Qazî Mihemedî ewro her parçeyê Kurdîstanî de têkoşîn dewam beno.
Qazî Mihemed serra 1900 de rojhelatê Kurdîstanî, Mehabad de ame dinya. Domanîya xo de mektebê dîn “kutabxane” de wend û perwerdeyê xo ya bingeyênî kî kitabanê keyeyê pîyê xo ra dî. Sey serekê KDP-Î, 22. çele 1946 de meydanê Çar Çira yê Mehabadî de Qazî Mihemedî Komara Kurd a Mehabadî îlan kerde û bî serekkomaro verên ê a komare. Komare 11 aşman ra tepîya hetê artêşa Îranî ra ameye rijnayene. Qazî Mihemed û hukmatê xo 30. adara 1947 de amey darde kerdene.
