Qezayê Bidlîs Motkan ra tepîya juna (yewna) xebera kommezelê Dêrsim ra ameye. Çemîşgezek de de mezela 19 gerîllayan amey dîyene.

Hewteyo bîn de qezayê Bidlîsî Motkan de cayê qereqolê cendirmeyan de ju (yew) mezela bi esteyê 19 însanan tede ameybî dîyene. Na rey kî Dêrsim de mezelêda bîne ameye dîyene û enformasyonan ra gore 19 leşkerê hêzanê PKK erzîyay uca (uza). Serra 1997 de vîst gerîllayê kurdî hetê eskeranê dewleta Tirkîya amey hêriş kerdene û no hêriş de tena ju (yew) gerîlla dirbetin xo xelisnaybî ra. 1997 de Gula Elî de 19 gerîllayî ameybîy kiştene û înan ra tena leşkero bi nameyê Perver Dêrsimî mendîbî. Enformasyonê ey ra gore nêzdîyê Çemîşgezek de 19 meyîtê gerîllayan pîya ju (yew) mezele der ê.

Heta nika famîlyayanê nê gerîllayan zaf reyî waşt ke meyîtê domananê xo uca (uza) ra bicêrê, labelê naye nêame qebul kerdene. Merdeyan ra 5 teneyî dêrsimij ê.