Rojnamegero armenî Hrant Dînk ke çar serran ra ver ame kiştene, hetê rêxistinêda Ezilenlerin Sosyalist Partisi (ESP, Partîya Sosyalîst a Pelixîyayeyan) ra Dîyarbekir de ame yad kerdene. Çalakîya ke tede pankartê jê (sey) “Ma Hrant Dînk û Musa Anterî yad kenîme, edalet wazenîme” û sloganê jê (sey) “Ma pêrune Hrant Dînk îme!”, “Wa biciwîyo biratîya kurd û armenîyan” amey eştene.

Serekê partî yê mintiqa Mustafa Nacî Toperî da zanayene ke Hrant Dînk û xeylê roşnvîrê bînî hetê hêzanê dewleta Tirkîya ra amey kiştene. Ey va, “Çar serrî eşkera yo ke eksê pêro belge û îtîrafan de berpirsîyar û kiştoxî nêamey ceza kerdene, wa plan beno ke ê serbet benê. Vizêr merdimê (mordemê) hîzbulkontrayî verday ra kuçeyan, nika kî hazirîya raverdayîşê kiştoxanê Hrant Dînkî kenê.”

Toperî ra gore serebûtê Hrant Dînkî biratîya şaranê kurd û armenîyan ard raver. Aye ra kî dot ey qiseykerdişê xo de beyan kerd ke nê çar serran de xeylê çalakîyî amey viraştene, labelê partîya hukmdare ne edalet ne kî çareserkerdişê problemî rê ehemîyet musnena.