Broker (Fîlm)

0

Fîlmê bi nameyê “Broker” (브로커) projeyê rejîsorê japonî Hîrokazu Kore-eda yo verên o ke bi kadro û ziwanê koreyijî ame viraştene. Babete yew pit o ke hetê maya xo ra verê keyberê yew dêrî de yeno ca verdayene. Seba ke maye nêwazena lajê xo bi nameyê maya xo ya qilêrine bêro herimnayene, a ey ca verdena ke wa dest bi cuya newîya pake bikero. Çi est o ke di merdimekî pitî verê dêrî ra tierenê û wazenê pîyaseyê ewladîye (adposîyon) de biroşê. Maye ke ferq kena ke nê di merdimekan lajê xo tirto, hîrêmêna (her hîrê) pîya yew keyeyo newe saye kenê ke nê domanî bihêrîno. Di polîsî kî kewenê rêça înan dima û game bi game hîrê şerîkan taqîb kenê.

Rejîsor tîya de seyrkerdoxan rê verhukmê ke vera dizd, goştarme û mayanê neçaran est ê, înan musneno. Nîşan dano ke raştîye de nê kesî kî însan ê. Seke Yilmaz Guneyî 50 serrî aver musna, însanî -rind ya kî xirabin- hetê dorûverê xo ra tesîr beno. Nîya rejîsor destpêlê fîlmî de yew karakter bi no tewir dano vatene: “Eke ti nê domanî ca verdana, çayê ana dinya?” Labelê, her ke şono, peynîya fîlmî de seyrkerdox nê verhukmî henî asan qebul ya kî pare nêkeno. Merdim vîneno ke maya nê pitî semedê xirabinîya xo ra ney, la rîyê şert û mercanê zehmetîyan ra mecbur menda ke lajê xo rono verê dêrêk. Nîya fîlm armanc keno ke pêro însanî bê verhukm bêrê dîyene. 

Nê semedî ra fîlm de merdim hîrê qutîyan vîneno. Qutîya verêne de pitik est o, qutîya dîyine kî mînîbuso ke tede raywanîye kenê û qutîya hîrêyine kî xeyalî û sembolîk a. Merdim na qutîya peyêne nêvîneno, na qutîya verhukman a. Peynîya peyêne de ma pêro însan îme bi qusur û xeletîyanê xo. Raştîya ma pereyî, şohret û unwan ney, la însanîya ma ya.

“Broker” sey filmê koreyijî “Parasite“ ro raştîya şarî cêreno. Na raywanîya cigêrayîşî de xeylê qeraranê xelet û raştî û rayanê têwerteyî mîyan de merdim wext û ca keno xo vîr ra. 

“Broker” Festîvala Cannesî ra dime Festîvala Fîlman a Munîhî de kî xelata tewr rinde girewte. Qeseyê fîlmî “Weş be ke ti bîya / ameya dinya” hetê jurî û seyrkerdoxan ra reaksîyono rind girewt. Jurî va ke “Ma nê fîlmî de yew parçeyê xo dî”. 

CEWAB BIDE

Keremê xo ra şîroveyê xo binuse
Keremê xo ra nameyê xo binuse