Tarîx de xeylê hêzan zor ra û bi çekan ra dest eşt mal û milk û erdê şaranê bînan. Prosesê nê dagiran tim manenê ro yewbînan.
– Verê, dest nanê erdê şaranê bînan ra, na gama verên a. Eke şaro ke tîya ciwîno qelebelix o, karê îşxalkeran zor o, çike besenêkenê pêroyê şarî teber kerê. Eke kerd, reaksîyonanê dewletanê dinya ra tersenê. Labelê tîya de dagirkerî gamanê xo giran erzenê. Verê veran, kesê wextê îşxalî de teberê mintiqa der ê ya kî semedê cengî ra remayî, nêverdanê ke ê ancîna peyser bêrê (Mîsal: Efrîn, Kerkûk).
– Dagirkerî yew het ra qayîtê reaksîyonê dewletanê dinya kenê, la heto bîn ra sey gama dîyene, cayo ke dest na pira, yew parçe ci ra cênê, ney kî pê pawitena welat û şarê xo ya kî pawitena sînorê xo bahane kenê. Nê parçeyê welatî ra pêro şaranê bînan vejenê û dormeyê ci de kî dês mûnenê (Mîsal: Rojawan).
– Dima, bi proje ya kî kampanyayanê girsan îşxalkerî ceribnenê ke nufusê roniştoxanê kanan bivurbê. Yanî, demografîya na cografya vurnenê. Fikr basît o: eke kesê neweyî ke uca ca cênê, zêdêrîye der ê, ê hêzê neweyî êdî sey dagirkerî nêvînenê.
– Tenêna tepîya kî dagirkerî sîstemêdo henên nanê ro ke tayê roniştoxî benê dewlemend ya kî kalîteya cuya înan bena berze. Mavajîme, ê besekenê welatê îşxalkeran de bigureyê, banê dagirkeran de wezîfe bicêrê ûsn. Bi nê metodî wayîrê welatî yê neweyî ceribnenê ke cuye bibo normal û şar xo vîr ra bikero ke kam serekîye der o. Çi est o ke dagirkerî rind zanenê ke şar riza nîyo ke binê îşxalî de biciwîyo. Hende ke qisimê şarê xozayî dizdî ya dest bi hazirîya xoverodayîşî bikero. Duştê nê qisimê şarî de dagirkerî hêzê xo musnenê û key ke lazim bî, teda û şidet kêmî nêkenê.
– “Divide et impera”: Metodê romayijan o, vano “lete bike û hukm bike”. No metod hetê xeylê dagirkeran ra yeno xebitnayene. Seba ke îşxalkerî nêwazenê ke şarê îşxalbîyayeyî yewbînan rê piştî bidê ya kî pîya bigureyê, her ûsul ra ceribnenê ke şar parçe kerê, pê verdê û taybetîya nê şarî ya sosyale xirabin kerê.
– Dagirkerî yewna taktîk gurenenê: mîyanê şarî ra kesê ke wayîrê prensîb û nasnameyê xurtî nîyê, kese ke perewer ya kî oportunîst ê, ro înan cêrenê û peynîye de nê tewir kesan kenê ajanê xo. Nîya dagirkerî benê wayîrê enformasyonan kî. Bi nê zanayîş û enformasyonê nimiteyî ke ajanê xo ra peyda kenê, şar pê cênê, şanenê persan ver, erzenê zere. Nîya awanîya komelî kenê xirabin.
– Remnayîş ya kî hepiseştiş seba îşxalkeran cayêdo berz cêno. Bi nê ûsulî, keye û derûdorê hepsîyan rê mesaj rusnenê: çima ke rehet nêvindetî, şima kî henî yenê zereeştene ya kî remnayene.
– Arêdayîşê enformasyonan muhîm o. Coka dagirkerî îstîhbaratê xo yê nimiteyî her ca de danê gurenayene, wazenê her ca ra haydar bibê ke bandura xo pêt bikerê. Leyê pereyan ra hêrînayîş, hepis û îşkence metodê înan ê bingeyên ê.
– Dagirkerî her çî kenê binê kontrolê xo, labelê ters ra nêxeleşînê. Ê kî zanenê ke rojê bêro ke şar sere dano we û çekan cêno xo dest. Nê semedî ra her kes (ajanê xo kî tede) înan çim de tehlukeyêdo potansîyel o.
– Teselîya dagirkeran ke kewte, pêro awanîyanê ser û binerdan rijnenê û erdo ke dest nayo pa, teriknenê.
