Destê Edîtorî ra:
Zîlan, Qoçgîrî, Dêrsim, Helebce û Şengal ra tepîya qetlîamê şarê kurdan Kobanê de dewam keno. Bêdewletîya kurdan xo bi tertele, gonî û hesîran musnena. Se serrî yo ke şarê ma game bi game hesabê xeletîya xo û bêdewletîya xo baha dano.
Xeletîya stratejîk a Mesûd Barzanî bîye ke rîyê biratîya tirkan û Erdoganî ra hebê mendbî ke peynîya Kurdîstanê Başûrî bêro. Başûr bi şehîdîya 1.200 pêşmergeyan musna ke bi dişmenanê tarîxîyan ra dostênî û biratîyênî nêbena. Di aşman ra ver meydanê Dîyarbekirî de Barzanî û deyîrbazê efsanewî yê kurdan Şivan Perwerî destê Erdoganî pêgirewtbî. Labelê înan nêzana ke dişmenî rê destdayîş bi gonî û hesîr peyser yeno. Çi heyf o ke di aşman ra tepîya terorîstanê DÎ (DAÎŞ) û piştdayoxê xo yê Tirkîya xo nêzdîyê Hewlêrî bi gonî û bi hesîr û bi dej musnaybî. Barzanî uca de dî ke biratîya bi dişmenanê tarîxîyan sey selahîyetdaranê tirkan, ereban û farsan nêbena, eke bena kî şarê kurdan giran bedelê naye dano.
Stratejîya Rojhelatê Mîyanênî ya Tirkîya bi piştgirîya DYA seba Kurdîstanê Başûrî bi zerarêde giran bin ra xij bîye. Tirkîya senaryoyê xo rind nuştbî: DÎ (DAÎŞ) kewena Kurdîstanê Başûrî û Barzanî remeno Tirkîya ke alakurtarê artêşa tirkan biwazo. Nîya artêşa Tirkîya kewena Kurdîstanê Başûrî û hewnê dewletbîyayîşê kurdan noca rijîno. Dişmenîya nîyanêne, dostpeydakerdişo nîyanên kî… Verê cû tena Tirkîya kerdbî eşkera ke a azadîya Kurdîstanî qebul kena, labelê dizdî ya bi DÎ (DAÎŞ) planê xo viraşt û DAÎŞ varnaye kurdan ser o. Bi resayîşê ardimê DYA, Îsraîl û Ewropa planê tirkan bî parçe û terorîstî Kurdîstan ra teber erzîyay. 1.200 şehîdanê pêsmergeyan nawit ke dişmenanê tarîxîyan de ancîya biratîye nêbena.
Başûr ra dime Kurdîstanê Rojawanî kî dersa xo dîye. 15 serrê biratî û aştîya bi Tirkîya bîy, na fay kî kurdî giran hişyar bîy. 15 serrî xapênayîş ra tepîya PKK û serekê înan sey Barzanî dî ke bi dewleta tirkan dostênî nêbena. Nêzdîybîyayîşê Ocalanî girawa Îmralî de ancîya bi gonî û şehîdbîyayîşê 1.000 gerîlayanê kurdan hesabê xo da. Stratejîya tirkan a ke bi ajananê xo Kurdîstanê Rojawanî bi kantonan dîzayn kenê, hebê mend ke şarê kurdan tede biveso. Zêde nêzdîbîyayîşo nîyanên bi dişmenan, Başûr ra dime sereyê Rojawanî kî dejna û hîna dejneno.
Çi rind o ke senaryoyo qilêrin ê dewleta Tirkîya hetê DYA ra ame wedardene û Başûr teslîmê Komara Tirkîya nêbî. Başûr de stratejîya Tirkîya bîye ke virênîya Amerîka de bêro, labelê nika kî Rojawan de Tirkîya fehm kena ke duştê DYA û Ewropa de hewnê neo-osmanîyî qebul nêvînenê. Di serrî yo ke Tirkîya (DÎ) DAÎŞ seba karê xo xebitnaye û nika DYA na çeke destê tirkan ra girewte û duştê tirkan de xebitnenê. Başûr ra dima Tirkîya Rojawan bi kantonan kerd vîndî.
Barzanî xeletîya xo dîye û leze kerde rast. Labelê PKK û Ocalanî xeletîya xo ra dewam kenê. Hîna kayê Tirkîya ra yenê xapênayene, peyê DÎ (DAÎŞ) de Îsraîl cêrenê, kayê dewleta Tirkîya ra hişyar nêbenê. Henî aseno ke PKK na rey bi israrkerdişê planê dişmenî giran kena vîndî. Îstîqbalê Kobanê hîna nêame nuştene.
Çareserîye tena cikewtişê pêşmergeyan bi Kurdîstanê Rojawanî û wedaritişê sînoranê werteyê her di parçeyanê Kurdîstanî der a. Êndî gerek kurdî hêzê xo heta Deryaya Sipîye biresnê. DYA duştê planêde nîyanen de nîyo. Binê kayê dewleta tirkan ra xelesîyayîş kurdan rê qezenco girs ano. Bi îdelojîyanê kanan û xelesnayîşê dişmenî nêbeno. Çitur ke Başûr xafîl de xelesîya, nika kî no firsend destê Rojawan û Vakur der o. Reya verên a ke konjunkturê polîtîkaya dinya seba kurdan gureyeno.
Wext wextê biratîya bi dişmenanê sîmîlekerdox û qetîlanê kurdan nîyo. Wext wextê yewîya kurdan o. Ma çend reyî dî ke bêdewletî ma rê bî tertele, dej û derd. Êndî na rey wext wextê yewî yo û wextê dewletbîyayîşî ya. Ne DAÎŞ ne Tirkîya ne Barzanî ne PKK ne kî dîn û îmanê na dinya besekenê ke duştê dewletbîyayîşê Kurdîstanî de vindê. Biwazo ya mewazo her kes na rastîye qebul bikero.
Seserra 21. seserra kurdan a, naye bi herfanê girsan binusê kitabanê xo.
