Cengê Qerebaxî yo ke peynîya aşma êlule ra nat Qefqasya de qewimîyeno, tede nika Armenîstan û Azerbaycanî çend ceribnayîşan ra dime qerar da ke adirbes virazê. Adirbes pê mabênkarîya Rûsya û bitaybetî serekkomar Putînî ame ronayene û roja dişemîye ra dime keweno fealîyet. No qerar Armenîstan de bî sebebê protestoyan.
Goreyê peymana newîye, Rûsya seba panc serran da-2.000 “leşkeranê aştîye” rusnena herêm ke ê rayan kontrol bikerê û qayît bikerê ke reyna pêrodayîş mevejîyo. Her di hetê cengî mevkîyanê xo de vindenê, yanî cayê ke Azerbaycanî nê cengî de girewtê, nikayî rê Azerbaycan de manenê. Ser o kî her di hetî meyîtanê leşkeranê xo vurnenê ra.
Heta nika hîrê reyî ceribnîya ke peymana aştîye ya kî adirbesî bêro viraştene, labelê nika reya verên a ke serekanê dewletan çîyo resmî îmza kerd. Destpêkê cengê Qerebaxî ra bi nat 1.200 kesî merdê. Çi esto ke na hûmare bi îhtîmal berzêr o, çike Baku hûmaranê xo sansur keno. Tayê melumat ra gore Tirkîya kî wazena hêzanê xo birusno Qerebax, la Tirkîya parçeyê peymana resmîye nîyo. Çimeyê bînî vanê Tirkîya tena rayanê Qerebaxî kontrol bikero, tayê bînan ra gore kî Tirkîya Azerbaycan de leşkergehê virazo.
Protestokerdoxî erzîyenê parlamento
Qerarê îmzakerdişê peymane Armenîstan de bî sebebê protestoyan. Serekwezîrê Armenîstanî Nîkol Paşînyanî rîpelê xo yê Facebookî de va ke o mecbur bî na peymana derdine îmza bikero, la na nêna manaya binkewtişî. Naye ser o xeylê protestokerdoxî vejîyayî kuçeyan û erzîyayî parlamentoyî ser. Yew xebere ra gore tayê kesî kewtê keyeyê Paşînyanî û çîyê ey ê taybetî kî tiritî.
Analîzanê pisporan ra gore peymane yena manaya teslîmê Armenîstanî û nîya Armenîstan qisimê Qerebaxî yo girs keno vîndî. Vanê ke Paşînyan û hukmatê xo ceng xelet nirxna û derheqê cengî de şarê xo rê melumato xelet da. Coka xebera peymana seba xeylê armenîyan şok o.
