Agêrayîşêko Bêpeynî (Şîîre)

0

1.

Cuye çerx û dem û dewranê xo de
Ez haylemeyê xo de… 
Ti vanê heme saetî xeripîyê
Heme mewsîmî kewtê têzere
Heme vilikan ra boya mergî yena
Heme domanan îşikê xo kerdê vîndî
Heme teyran halînê xo caverdayê û şîyê…

Goristan…
Goristanê hewz û vilikinî
Merdimê bêxem û bêqesawetî
Qilancikê ke fek de zewt û zunetî...
Dêsanê rijîyayîyan de puyê korî…
Û celadî, parskerî
Dima xapênayîşêde rincanî dormeyê eynî adirî de têlewe de yê
Dormeyê eynî adirî de çenganê destanê xo de hisîranê xo kenê kom
Û guneyanê xo yew bi yew adirî de veşnenê
Ax guneyî,
Kulê bêar ê ke xişmê homayan ê bêwextan de sey telîyan benê zergûnî.

2.

Şaristano xeyr û xerîb
Kuçeyê teng û dergî
Banê bêveng û korî
Pisîngê sîyayî
Sura serdina ke porê daran kena şane
Şilîya ke rîyê waşteyan şuna û kena pak
Cinîyê rindek û xêxê ke şaristan bi boya ci serxoş o
Camêrdê ke qefelîyaye yê û ci ra boya ereq û tutinî yena
Kor û kerr û lalê ke guneyan ra dûrî,
Tarî û bêvengîya dinya de hewnanê xorînan de
Û ez a ke vîndîbîyayî ya
Ez a ke mabênê merg û cuye de dejê xo yê korî rê manayan ra gêrena
Ez a ke dem û dewranê xo ra kewta, zereyê lêl û zelemeleyî de…
Ez şaristanêko xeyr û xerîb de
Dêsêde kan de neynikêda şikîyayîya dardekerdîye
Û rîyê ezeb û xortanê bêmirad û xemgînan mi de nimiteyî yê
Ez estanikêda qedexeya kane, mana û çekuyanê mi ra boya gonîye yena
Ez gilêndikêda alozîyî ya, fekê reştika demê qilêrinî de bêvindetiş çerixîyena
Hişê mi de keyfweşîya domanîye, vengê deyîrbazanê koran
Û peşmirîyayîşê cinîyanê porhineyan…

3.

Zanena, şayîya min a nêmcete
Na kila xo çîkê adirê to yê mirdnebîyayeyî ra girewte
Ti nêzana, zereyê mi de reyna o vergo vêşan zureno
Û serd û şewatê hezar serran reyna zereyê mi de cemed dano girê
Heya, para mi rê bêvengî û kerrîya ê koyananê berzan kewta
Her şewe ez bi a bêvengî û kerrîya kore hesreta xo ya hare lawnena
Birînan û dejanê xo bi çinbîyayîş û pawitişê to derzena û kena pîne.
Nika şêmûga berê mi şikîyaye û ustina keyeyê mi dêm dîyaya
Nika her çî şikîyaye û vilakerde yo
Û çimê min ê qefelîyayî reyna rayîran de…

Çimê talî,
    destê talî
        û ruhêko rincan
            û bêzar…

4.

Agêrayîşêko bêpeynî
Însano heciz û hêvîdar
Cinîke huşk û bêqusure
Maşuqê sermest û tenayî
Û marî
Qijikî
    Şewşewokî
        Şaîrê xirabinî
Û kitabê pîrozê ke ripelanê ci de
Heme çekuyê pîrozî dilopînê zereyê hîçîye..
Heme şîîrê mi tewreyêde dirîyayî yê
Û heme lananê ci ra ti rişîna
Û ez giran-giran bena kêmî…

5.

Heme qelemî pûç ê,
Heme çekuyî jengin ê
Heme şîîrî zur ê
û heme manayî nêmcêt ê
Rîyê Eşq û Rastîye de...

CEWAB BIDE

Keremê xo ra şîroveyê xo binuse
Keremê xo ra nameyê xo binuse