Wendoxê delalî,
Yew hewte yo ke dîaspora û Kurdîstan de merasîmê newroze dest kenê ci. Şar adir keno we, kilaman vano, govende gêno. Televîzyon û kanalanê medyaya sosyale de vîdeoyê newrozanê verênan musnînê. Nê vîdeoyan ser o rîyê miletî de tim yew huyayîş û meydanî kî pirrê keyf û şayîye bîyî. Eke ma nêzanayêne, bivatêne ke derdê kesanê ê wextan çin bîyêne.
La tabî henî nêbî. Zulm û teda ke ewro serê kurdan de yena kerdene, o wext kî est bîye. Hetta, kamî ra ke persena, beno ke vanê o dem dahîna xirab bîyo. Feqirîye, neheqîye, asîmîlasyon û ceng tim hemparê tarîxê ma bîyî. Ancîya kî şar ha meydanan de: destan de destmalî, kila adirî ver de reqis û lewan de kilamê newroze. Teseduf nîyo ke bi desan şarî 21. adare de newroze bimbarek kenê, la tena şarê kurdan de no roşan şayîye ra zêde bîyo yew tîmsalê xoverodayîşî. Tarîxê ma tim lej bî, newroze kî adirê nê ruhê xoverodayîşî her serre newe ra geş kena. Ma caran ney xo vîr ra mekerîme.
Coka ma pêro derd û derbeyan ver çok ronênanîme. Şima kotî benê wa bibê, no adir caran wemeşîyo. Heto bîn ra na newroze de dezê erdlezî nêame xovîrrakerdene. Êyê ke îhtîyacê ardimê ma yê, ê ke zelzele û trajedîyan de her çî û her kesê xo kerdî vîndî, ma înan qet xo vîr ra mekerîme. Eke îmkanê şima est o, wa na newroze tenê dest bidê înan kî, çi madî bo çi manewî. Têdest a ma nê wextê tarî de çila wisarî berz bikerîme. Wa her kes bivîno ke kurdî hema pay ra yê.
Şaro kurd bi nufusê 40 mîlyonan hîna wayîrê dewlete nîyê, ziwan û kulturê kurdan hîna qedexe yo. Cayê kurdkî ekonomî, sîyaset û perwerde de hîna çin o. Labelê kurdî hîna wayîrê hêvîya bêmerg ê, herçiqas ke giran bo, ancîya her serre yewna game ra resenê hedefê xo. Raya ma rakerdî ya. Pêro pîya ma na raye roşt bikerîme.
Newroz û hewtemalê şima pîroz bo.
Bimanê weşîye de,
