Badê vîndîkerdişê maçê verênî duştê Xirvatîstanî de bi 0-3, ekîbo milî yê Tirkîya na fay maçê rovanşî Zagreb de bi 0-0 mend û aye ra şanşê kalîfîkasyonê kupayê futbolî yê Ewropa 2012 dest ra şî.
Zagreb de ekîbê Tirkîya bi heşt kaykerdoxanê tezeyan vejîya stad. Xirvatîstanî bê rîzîko kay kerd û kontrolê maçî tirkan nêda. Tayê şanşê Tirkîya estbîy, labelê ekîbî besenêkerd bi golêde rew şanşê xo yê kalîfîkasyonî bizêdno. Leteyo juyin (yewin) de Tirkîya tenêna weş kay kerd, la leteyo dîyin de xirvatan maç girewt xo dest. Hîrê şanşê golî estbîy, labelê xirvatan kî besenêkerd ke înan biçarnê gol.
Bi no netîce ra Tirkîya jê 2004 û 2006 de kupayê Ewropa yê 2012 de kî çin a. Antronerê Tirkîya Guus Hîddîngî maç ra ver daybî zanayene ke karê xo caverdano.
Nika seba na xebereya kehne mi yeno vîr. Demo ke mi Batman de lîse wendêne ma mektebe de leylî mendêne. Ge ge maçê neteweyî yê ekîbo fûtbolî yo Tirkîye estêne. Ma kî heme wendekarî şiyêne ver tvyî û xo rê maçî temaşa kerdêne. Wendekearî bivaj pêro Kirdas bî, jew-di embazê Erebî zî estbî. Finêk mi û embazêdo ma yo bîn xo bi xo qerar girewt ke a rey nê Tirkîye la ekîbo duştê Tirkîya desteg bikerîme. A rey kî Norwêj duştê Tirkîye bi. Ma do bi golê aye şa bîyêne, kêf bikerêne. Nika nêno ra mi vîrî ke netîce se bi. La demo Norwêc golêd eşt Tirkîye mi û embazo xo yo bîn şabîyene ra welwele kerd. O wext heme kesî ma rê qayît kerd. Hêrs bîbî. Çimê xo ma rê sûr kerdêne. Rastiken ez û o tersay. Êdî nika ke ez na xatiraya xo ewnîyena, rindêr vînena û fahm kena ke tesîrê kolonyalîzma Romî resabi, 3u resaya kamcîn radde.