“Seyîd” – Kamer Soylemez

1
693

“Seyîd” / Peya “Şîîrê Kirmanckî”

Mikaîl Aslan & Cemîl Qoçgîrî

Veng: Kamer Soylemez
Muzîk: Anonîm (Dêrsim)
Vokal: Aynur Dogan
Tembure: Cemîl Qoçgîrî
Resime: Tahsîn Kaya

Şîîre/Vate:

Waxtê de kokimêde herdîssipê bîyo
Zereyê zalimî de xof û ters bîyo
Nêzon, mavzerê xo bîyo, çînê bîyo?
Vajîno ke sewdara xo bîya
Vato, “Ez tawa nêwazen koyûnê xo ra qederî,
mal û milkê dinya yê sima bo.
Ez nê koyû ra kamçur keşî nêdan”
û vejîyo koyû.

Verê coyî aşîrû poştî da ci
Sondê Halborî ra tepîya
tayê remê bîyê xîyanetkarî
tayê kî ci rê bîyê hetkarî
Kewto ra raye peya û asparî
Kokim bîyo saye her ca de
binê kemerû de û birrû de
Nêamo vînitene deste de
ne kî koyû de
Bîyo dilapa awe gino çemê Mizurî ro
Vanê, Mizurî bîyo hewze
dismenî rê alef nêbîyo

Hem verva kermê zereyê xo
hem verva dismenî
Di cayû de kewto mereve
Vanê, Sahan kişîyo – ey do pêro
Alîşêr sare birîyo, Zarîfe qersune bîya
Ey onca kî do pêro
Çer û çîkê xo wes nêmendo
Cendegû Dereyê Lacî kerdo pirr
Ey onca kî do pêro
Domanî bîyê kalî
kalî bîyê wele
Kokimo herdîssipê tenêna bîyo sipê
Koyû de kemerî xo rê kerdê cile
Onca kî qewxa xo ra nêtexelîyo
Vêsan-têsan hama sereberz fetelîyo
Kokimê ma nêvineto, do pêro

Qudretê sewdaya xo ci rê bîyo deyax
Teyna mendene ra nêterso
Pelgûnê darû de kewto têwerte
Kemerû ra has kerdo
Ebe qal-tifong kewt ra zalimê dime
Kilaşînge ci rê bîya mavzero bêveng
Onca kî goreyê îtîqadê xo dismen hesno pê
henî do pêro
Teqete wayîrê xo ra gureta
Kewto werteyê adirî, nêveso
Bîyo çîk, dinyaya dismenî vesna

Xezebê Heqî xeznaya Heqî de bimanê
Zalimî birrî sanê adirî ver, kokim nêdîyo
Kemere kemere ser ra nêverda, kokim nêdîyo
Zalim şîyo, kokim werteyê adirî ra vejîyo
Cixara xo pîşta têra
jîyarû de qesey kerdo
Zalim şîyo, kokim binê kemerû ra vejîyo
Bastuna xo kerda tamur cinita
ebe hardê dewreşî bîyo ju û reqeşîyo
Nîya welatê xo ra cênêvişîyo

Vanê, peynîye de gino dama qeseyê camêrdîye ro
Bi na tore kewto ra bêbextî dest
Çayê na qese rê îman ardo?
Naye pers mekerê
Vanê, waxto ke darde bîyo, kokim bîyo cênc
lazê xo bîyo kokim
Zalim şîya kokimî ra terso
Vanê, tam na dem kokimî nalet ardo ra zalimî
û çiman ver ra kewto dûrî

Vanê, mezelû ser o vas royeno
Mal û gayî na vas wenê
Domonî sit simenê
Ebe na tore royê kokimî kûno az û uzê neweyî
Coka cayê mezele ci nêdo
coka mezela xo çîn a
Vanê, sir bîyo şîyo

Leminê leminê leminê…
Na gonî ma de yena dîyayene
Merdene çîyêde bîn o
Tew wayênê, birayênê
Heyfê sima, heyfê sima!
Ma kokim qey îta mireno, ma kokim qey îta mireno?
Ma kokim qey îta mireno?

1 ŞÎROVE

  1. Pirika mi vatene Seyidi nimerene… Ey dismen ti hen vana ke Seyide ma merdo??? Qe mesabe, o mezge, zerya u gonya kirmance milyonan dero. Peyniya dinyak biyero, o je tere tij u asme cerekino. Ey dismene xex, bizoneke asimilasyone ti, terteleye ti, awbende ti ma keno dirbetin, hame nikiseno. Ti bizone ke peyniya ti, peyniya mara tenena nejdiya….

Comments are closed.