Wendoxê delalî,
ewro DêrsimInfo reseno desserrîya xo. Tam des serran ra ver, 1. çele 2010î de, keyepelê ma dest be fealîyetê xo kerd. Raya ke ma ameyîme, rayêda derge bîye. Ewro DêrsimInfo keyepelanê kirmanckî (zazakî) mîyan de cayêde berz der o. La raywanîya ma hema nêqedîyaya! Xeylê plan û projeyî hawo pabeyê ma yê.
Her çî yew fikr ra gina de. Çend hevalê dêrsimijî serra 2009î Almanya de ameyî têlewe. Zereyê înan de yew xeyal girpayêne: ma sîteyêk rakerîme, tede her mezwûyê cuye ser o nuşteyî estbê û her nuşte se ra se be kirmanckî (zazakî) bibo. Çîyo ke ewro normal aseno, o wext nadîr bî. Kirmanckî kovar û kitaban de cayê xo girewtbî, la warê Înternetî de domano sêwî bî. Dinyaya dîjîtale de temsîlkarê ziwanê ma çin bî. A roje ra nat wezîfeya DêrsimInfoyî bellî bîye: wa kirmanckî her warê heyatî de vila bo. Destpêk de ma xeberî weşanayî, badê roportajî û badêna kî her babete ser o nuşteyê ma ameyî nuştene. Sîyaset, ekonomî, teknolojî, magazîn, weşîye, spor… Çi ke dinya de estbî, ma va ganî be kirmanckî kî estbo. Nîya kî ma kerd.
Serrî vêrdî ra, DêrsimInfoyî xo adapteyê dem û dewranî kerd. Dîzaynî vurîyayî, muhtawa vurîyaye. Ma êndî giranî nêdanîme xeberanê aktuelan, la xo danîme meselanê hîrayan, hîkaye û nuşteyanê kompleksan ser. Hedef hîna raverberdiş û atraktîfkerdişê ziwanî yo, la yewna format de. Be keyfweşîye ma dî ke nê serranê peyênan de keyepelê xeberan ê kirmanckî bîyî ra. No hem zafrengîya ziwanê ma rê dewletî ya, hem kî ma rê destûr dano ke xeberan ra ravîyarîme meqale û mewzûyanê bînan ser. Ewro şima vînenê ke keyepelê ma bîyê wargehê vîdeoyan. Ma roportaj û dokumentaran virazenîme, tarîx û şaristananê dinya be veng û reng anîme ekrananê şima ver. Nê tewr gureyî yê hîna dewam bikerê. Kanalê ma yê YouTube beno arşîvê pêro xebatanê ma.
Çîyo ke 2020 de newe yo
Kamo ke cayê xo de vindeno, peyser şono. Coka sey her serre ma di-hîrê çîyê keyepelê xo vurnayî. Des serran ra dime ma êndî logoyê xo kerd newe. Resimê dinya yo ke verê cû asayêne, hurendîya ci de logoyo neweyo mînîmalîst ame. Parekerdişê ma medyaya sosyale de kî dewam kenê, bitaybetî Facebook û Instagram de ma rişteyanê cîya-cîyayan pêşkêşê şima kenîme.
Çîyo bîn ke newe yo, beşê “Kirmanckîya Dêrsimî” yo. Herçiqas ke DêrsimInfo xîtabê pêro kirmancan keno, ma wazenîme ke dêrsimijê ma kî ziwanê xo de biwanê û biciwîyê. Coka ma qerar da ra ci ke ge-gane tayê nuşteyê ma kirmanckîya standardîzekerdîye de ney, la be fekê Dêrsimî vejîyê. Nê nuşteyî pêro kategorîya “Kirmanckîya Dêrsimî” de kom benê. Seba ke fekê Dêrsimî de tayê taybetmendîyê vengan estê, ê nuşteyan de ma tayê herfî îlaweyê alfabe kerdî. Derheqê nê taybetmendîyan de redaktorê ma yo nuşteyê xo de hîna zaf melumat bido. Nuştoxê ma tabî hîna serbest ê ke be fekê xo ya kî standard binusê, ma pêşkarê tarzê nuştoxan nêbenîme. Înan rê çêberê ma tim rakerde yo.
Rind ke şima estê
Peynîye de ma wazenîme sipasdarîya xo vajîme. Bê keda hende kesanê xeyrcan û zerrîveşayeyan no karê ma mumkîn nêbîyêne. Verê her çî ê kesê ke ekîbê ma rê be seyan saetê xo kerdî dîyarî û peroj û peşewe seba xizmetê ziwanê ma gureyayî, ê weş û war bê. Cayê înan sere û çimanê ma ser o yo. Yewna grûba kesan ke bê înan DêrsimInfo bêkeyf û bêmuhtawa bibîyêne, nuştoxê ma yê erjaye yê. Bi seyan nuşte, şîîr û meqaleyî kerdî hazir ke sîteyê ma pê înan bixemilnê. Wa qelema înan weş bo. Peynîya peyêne de kî wendoxê ma yê delalî estê ke be serran ma taqîb kenê, wanenê û be şîroveyan fikranê xo ma de kenê pare. Her çîyê ma şima rê yo ke şima her roje besebikerê her hoka dinya penceraya ziwanê xo ra bivînê. Şima pêro weş û war bê, pîr û kal bê. Rind ke şima pêro estê.
Be hêvîya desna serran, serra şima ya newîye bimbarek bo û gaxanê şima şên bo!
Bimanê weşîye de!
