Wendoxê delalî,
emser kî qedîya, serra newîye nawa ameya. Serra ke ma dîya! Çi şayî û çi derdan zereyê ma kerdî pirr. Xora, serre bi xebera sîyaye dest kerdbîye ci. Aşma çeleyî de dewleta Tirkîya ya dagîrkere bi tank û topan û terorîstan hêrişê veyveka Kurdîstanî, Efrîn, kerdbî. Heta adare xoverrodayîşê cengdaranê ma dewam kerd. Se û pancas hezar hemwelatîyê ma bi zor ra welatê xo terikna. Tarîx û qederê kurdan xo ancî tekrar kerd. Heta ewro a dirbeta ma weşe nîya. Seba dişmenanê kurdan emser serkewte vêrde ra: 8. êlule de dewleta Îranî xortê ma Ramîn Huseyîn Panahî darde kerd, ey dima çendna xort û kênekî… Welatê ma yo rindek Dêrsim aşma tebaxe de rîyê artêşa tirke ra veşa, şarê ma qehremankî xo ver ro da ke xozaya welatî bisevekno.
Çi esto ke duştê têde şertan de emserî kî tayê xeberê weşî ma rê ardî. Vakur de weçînitiş qewimîya. Herçiqas ke zafêrîya partîya HDP peyê beran der a, ancîya aşma hezîrane de besekerd barajî birijno û bikewo parlamento. Dina mizgînan zerrîya ma kerde şaye: aşma tebaxe de profesorê matematîkî Dr. Koçer Bîrkarî xelata Fîeldsî girewte. Aşma kanûne de kî Nadîye Mirad xelata Nobelî ya aştîye girewte. Wa neteweya ma pê her di serebûtan îftîxar bikero. Seba ziwanê kurdkî bitaybetî yew xebera 2018î muhîme bîye: new partîyê kurdan Dîyarbekir de ameyî têlewe û “Platformê Ziwanê Kurdkî” awan kerd. Armanc o yo ke kurdkî Kurdîstanê Vakurî de bibo ziwano resmî.
Nîya bîye serra ma yê kirmancan ya 2018î. Derd û kul, keyf û kelebut têlewe der ê. Ma hêvîdar îme ke serra 2019î seba kirmancan û Kirmancîye hîna zaf bi bereket, xeyr û bextewarîye ravêro. Wendoxanê xo rê kî sipas kenîme. New serrî yo ke ma taqîb kenê, destek danê û ma de pîya şonê raver. Eke şîretanê serra newîye pers kenê, wa weşîya şima bo. Gurekar la zerrîveşaye bibê. Welatê xo ra hes bikerê, wayîr ro ziwanê xo vejîyê. Vera dişmen û neyaran de xo biseveknê, xo ver ro bidê. Raya azadîye rayêda derg û dila ya, hîna xeylê karê ma esto. Labelê, omido ke zerrîya ma de gipeno, boyna adirê ruhê ma keno we. No yo ruhê Kirmancîye. Seke şaîrê ma yê namdarî Sey Qajî wextê xo de vato:
Zerrîvesayênîya welatê xo
Vera dismenî qar û înadê xo
Sare bide, mede sirr û binatê xo
Çîp bikuye perr û qeynatê xo
Bi nê qisayan, serrneweyê şima bimbarek, gaxanê şima şên bo.
Redaksîyonê DêrsimInfoyî
