Maço verên ê nêmfînalê Lîgê Şampîyonan de ekîbo alman FC Bavyera Munîh (FC Bayern Munîh) duştê reqîbê favorî FC Barcelona de bi 4:0 kewt ser. No netîce ra FC Bayern hema-hema vejîya fînalê lîgî.
Maç ra ver medya û çapemenîye de rîwayetî estbîy, gelo estareyê dinya Lîonel Messî do kay bikerdêne yan ney. Messî qorrê xo ra birîndar bî, labelê 12 rojî wext seba weşbîyayîş kî estbîy. Saeta 19:00 de ajananê xeberan xafil de da zanayene ke doktoran Messî rê destûr da ke kay bikero, saeta 19:45 de kî na xebere resmî bîye. Saeta 20:41 de Messî vejîya sahne, panc deqayan ra pey kî gude girewte xo pay, labelê dima şampîyonê dinya ra zêde çî nêame dîyene. Ge-ge ters ra pas peyser da, reyê kî paso xelet da. Normal de hereketê kreatîfî taybetmendîya Messî bîy, feqet ewro heyranê futbolbazê arjantinîjî teselîya xo ra birîyayê. Henî asa ke qorrê Messî hîna henî weş nêbîbî.
Defansê Bayernî pêt bî. Herçiqas ke verê henî asa ke Bayern Munîh defans de kewt tenge, esnaya maçî de merdimî dî ke almanî tehlukeyin ê. Deqaya 25. de golo verên ame: korner ra Robben gude girewt û sey surprîsedê bîn ey heto rast ra gude da mîyan ro. Danteyî kî qafike ra gude eşte ver, uca Mullerî kî sereyê xo ra 1:0 ard meydan. Tikêna tepîya îmkanê Barcelona estbî ke ê kî golê bierzê, labelê deqaya 29. de Danteyî virênîye ro Messî girewt.
Şansê FC Barcelona tenê rind bîy. Reyê Messî gude girewt binê kontrol û duştê çar kaybazanê Bayernî de vejîya. Labelê korner ra katalanijan besenêkerd gol bierzê.
Leteyo dîyin de reyna yew korner ra desinde pasê Mullerî ra Gomezî yew gol vet û maç kerd 2:0 (dq. 49). O ra dime ancîya Robbenî hunerê xo musna û bi ardimê Muller û Schweînsteîgerî ra deqaya 73. de netîce çarna 3:0. Barcelona ke sahne ser gindir bîye, nêşikîya îmkanê xo yê goleştişî bixebitnê. Bîlaeks, Mullerî Alabayî ra paso mîyanên girewt û deqaya 81. de golê 4. yê FC Bayern Munîhî eşt.
Peynîye de maç bi 4:0 qedîya, seke çar serran ra ver çêregfînalê Lîgê Şampîyonan de kî bî. Labelê o wext Barcelona qezenc kerdîbî. Maç de xeylê rexneyî kî vejîyay. Herçiqas ke nê serebûtî netîce nêvurnenê, hîna qewimîyay: golo verên ra ver futbolbazê Bayernî destê xo xebitna. Golo dîyin ofsayt bî û golo hîrêyin ra ver yew faul estbî.
Kaykerdoxê roje Thomas Muller bî ke bi angajman û hunerê xo FC Bayern Munîh berd raver. Pêro pîya, Bayernî bi konsentrasyon, dîsîplîn û taktîk kay kerd. FC Barcelona ke zafane wayîra gude bîye, besenêkerd ke îmkanê xo golan biçarno. Bayernî bi yewîya Lahm û Robbenî taktîkêde rindek gurena. Bêguman Barcelona nika poşman a ke înan Lahm serran ra ver Bayern ra nêherina.
Vile kerd çewt yan kî doçik sikit 🙂