Tîyatroyê Çewligî “Şehr-i Bingöl Tiyatrosu” merkezê Îstanbulî de semtê Fatîhî de salona “Fatih Belediyesi Zubeyde Hanım Kültür Merkezi” de roja şeme, 28.01.2017 saeta 19 de di kayê komedî bi kirmanckî kay kerd.
Kayo verên, Mehmud Ayçîçekî nuşto. Nameyê senaryoyî M4HMUD o (4 Mehmudî). Mewzûyê nê kayî, çar camêrdê çewligijî bê destûr û bê vîze remenê şinê Almanya. Almanya de tepişîyenê û înan kenê kamp. Nameyê nê çar kesan zî Mehmud o. Êdî mewzûyê nê kayî zereyê kampî de bi dîyalogê nê çar kesan vîyareno.
Temayê nê kayî bi şeklêko komedî yo.
Senaryoyê kayê dîyinî zî Yunus Çîftçî nuşto. Nameyê kayî zî herçiqas ke lewha de “TEYYARE” binusîyo zî, la ma ra vatê “Hawalî Alan” o. Mewzûyê nê kayî zî reya verêne ke 2015 de teyara yena Çewlîg, nuştox Yunus Çîftçî şeş rojî şino meydanê teyara û uca de goşdarîya raywananê teyara keno. Raywanê ke yenê û salona nê rasteyî de pabayê hereketê teyara benê, xo mîyan de dîwan kenê (tereqnenê). Temayê nê kayî zî reyna bi şeklêko komedî yo.
Ez nêeşkena hetê hunerî ra çîyêk vajî. Çunke ez hunerê tîyatroyî ra fehm nêkena. La çîyo ke hîna zaf keyfê mi ard, ziwanê tîyatroyî bi. Tîyatro, edebîyat de sey hîkaye û romanî nîyo. Tîyatro rasterast xîtabê çim û goşê însanan keno. Hîna gone yo. Hîna zelal yeno fehmkerdiş.
No kay de zî ziwan zaf zelal bi. Sade bi. Kesê ke temaşe kerd, pêro zî her çeku, her cumle fehm kerdêne. Her çiqas ke dîksîyon, telafuz û fonetîkê ziwanî yê Çewligî bo zî, la bi şeklêko fesîh ame fehmkerdiş. Muhtewaya mewzûyî bi şeklêko espîrîyel neql bîyêne. Dîyologê înan de îdyomî zafî bî. No zî vatişî xemelnêne. No sedem ra ez eşkena vajî, sere ra hetanî peynî nê her dî kayan de zî temaşekerdoxî huyayîş ra kiştî girewtî. Sere ra hetanî peynî hîrahîr û tîqatîq bî.
Na salone de 286 qoltuxê temaşekerdoxan estî. Hema-hema nê qoltuxî pêro zî bibî de. Nê warî de mîyanê çewligijan yê ke Îstanbul de ronişenê, tekilîyêka xurte asena. Ez saetêk verê cû şîya salone. Ez verê cû tersaya. Mi va do kes nêro û na kede zî do bîla sebeb şoro. La wexto ke saeta kayî ameye û kayî dest pêkerd, salone de cayo veng hema-hema nêmend.
Her katagorîya cematî ra temaşekerdoxî estbî. Hûmara cinîyan û ciwanan hîna zîyade bî. Qijî zî kêmî nêbî.
Elî Surmelî zî amebi û sere ra hetanî peynî temaşe kerd. Şima zanenê Elî Surmelî rêza fîlmê “Kurtlar Vadisi” de rolê “Zaza Dayî” de kay kerdêne. Xora o zî bi xo çewligij o û kird o. Badê ke kay qedîya, venga Elî zî dayê û dawetê ser dike kerd. Elî derheqê kayî de fikrê xo pêşkêşê temaşekerdoxan kerd.
Elî reyde yew roportajêko şenik zî virazîya. Elî nê roportajê xo de va: “Ma nika temamen bi kirdkî seba yew fîlm hazirîya xo kenê. Badê ke no fîlm qedîya û ame perde ser, do UNESCO no ziwano ke vanê mireno, bivîno”.
Goreyê vatişê rejîsor yan zî îdarekerê na grûbe Yunus Çîftçîyî hetanî nika 39 kayî amade kerdê. Nê kayan ra 13 kayî amey kaykerdiş. Reyna goreyê vatişê Yunusî tena Çewlîg de kay nêkenê. Şinê dewan, dewan de zî kay kenê. Û ziwanê nê kayan pêro zî kirdkî yo.
Kaykerdoxî pêro zî mamosta yê. Çend tene zî wendekarê Unîversîteya Çewligî yê. Pêro zî kird ê.
Seba na nuşteya to zaf sipas mamosta. La peynîya nuşteyê to de “Goreyê vatişê rejîsor yan zî îdarekerê na grûbe Yusuf Çîftçîyî hetanî nika 39 kayî amade kerdê. Nê kayan ra 13 kayî amey kaykerdiş. Reyna goreyê vatişê Yusufî tena Çewlîg de kay nêkenê.” na paragraf de goreyê mi yew xeletîya qijek bîya. Gerek rejîsor yan zî îdarekerê na grûbe Yusuf nê Yunus Çfîtçî bibîyayê. Zaf selamî Mamosta…
Harün Merheba;
Seba heşarkerdişê to zaf sıpas kena. Ez reyna ewniyaya notê xo yê a şewe ra rasta zî mi xelet nuşto. Herinda “Yunus”î de mi “Yusuf” nuşto! Yena a mana ke ganî merdim tu çîyêk şenik nêvîno. Ez verê verkan Birêz Yunusî ra, dima wendoxan û to ra efu wazena.
Ez nika zî qayila ke wa îdarekarê Dersîm Înfoyî na xeletîya mi rast kerî. Şima hemine rê weşîye wazena.
Ma to rê zaf teşekur kem mamosta yo erjaye. Zaf selamî….