Melumatê Enstîtuyê Çapemenî yê Mîyanneteweyî (IPI) ra gore azadîya çapemenîye û weşanî tewr zêde Tirkîya de yena şikitene. Komara Tirkîya o welat o ke tede tewr zêde rojnamegerî hepis der ê. Hûmara rojnamegeranê pêgirewtan hetta yê Çîn û Îranî ra berz a.
Welatanê Çîn û Îranî de 34 rojnemegerî hepis der ê, Tirkîya de na hûmare 57 a. Bitaybetî nê panc (ponc) aşmeyanê peyênan de xeylê rojnamenusî Tirkîya de amey eştene zere. Coka emser Tirkîya no rankîng de cayo juyin (yewin) ê dinya girewt. Heta nika her serre Îran ya kî Çîn virênî de bîyê. Xebera rojnameya tirke Radikal ra gore hîna mabênê 700 û 1000 dewayî rojnamegeran ser o amey rakerdene. Nê dewayî ke tey bêrê hesibnayene, hûmara hepsîyan kî zêdîyêna.
Sebebo zafê tewqîfan Qanûnê Mucedaleyê bi Teror ya kî ronayîş û endambîyayîşê rêxistina çekdar o. Hukmatê AKP rew kerdîbî eşkera ke no qanûn nêno vurnayene.
