Xeberan ra gore pêşmergeyî kewtî şaristanê Zumarî ke vakurê rojawanî yê Mûsilî der o. Pêrodayîşî bi çeteyanê terorîstanê Dewleta Îslamî (DÎ) hîna dewam benê.

Badê ke pêşmergeyan DYA û welatanê bînan ra çekî girewtî, înan tayê şaristan û dewî destê DÎ ra xelisnay. Hewteyo verên Neynewa de pêşmergeyî bi destekê jetanê DYA raver şîy. Roja çarşemîye kî pêşmergeyî warê petrolî yê Ayn Zala ke 80km teberê Zumarî der o, kontrol kerd. Çeteyanê DÎ ke xo peyser antî, hîrê çimeyê petrolî veşnay. Aye ra kî wet pêşmergeyî Koyê Batna ververê Zumar û Ayn Zala kontrol kenê. Goreyê fermandarê pêşmergeyan Lîwa Cemal Muhammedî ra Zumar de 92 endamê DÎ amey kiştene. 160 dirbetinî kî amey berdene nêweşxaneyê Mûsilî.

Mintiqayanê Sîrwanî Celawle û Sadîye de kî cayê DÎ hetê pêşmergeyan ra bombarduman benê. Eynî dem de bi hemkarîya artêşa Îraqî hêrişo paralel verba DÎ ame kerdene: pêşmergeyî vakur ra, artêşa Îraqî kî başûr ra hêriş kerd.

Rabîya û Zumar ra dime hedefê pêşmergeyan Şengal o, Muhammedî BasNewsî rê da zanayene. No taw Tûz Xurmatû de pêşmergeyan dewê Yengîce, Selam, Bebeş û Hasadoluyî destanê DÎ ra xelisnay.

CEWAB BIDE

Keremê xo ra şîroveyê xo binuse
Keremê xo ra nameyê xo binuse