Ferqê insanan u hêybanan est o. Hêybanan de, hisê şeref u ehlaqi, hisê haysiyeti çin o. Hêybani, gorê weyikerdena wayiri, tayê xuyê rındekan beşe kenê bıgêrê.
Kutik, wayirê xo ra mıxenetiye nêkeno, wayirê xo u mal u mılkê inan şevekneno.
Kerga ke vanê tersonek a, seba şeveknayena çêlan, xo ercena verê merdene.Seba hêybanan, na derheq de, zaf numuneyi est ê, hewca niyo derg bıkıme. ‘Derdê mı’, seba tayê mordeman ê.
Zonê xo inkar u qedexe kerdê, nêvırdanê bı zonê xo perwerde bı bo, qesi bıkerê, bınusnê, bıwanê, hama ê rehet ê.
Ebe na rehetiye xo ra vanê ‘ma roştnibir u zane yime’.
Ebe na rehetiye, dersa ehlaq u mordemiye, nasihatan danê.
Mı, seba ninan, ju nusnê xo de vat bi ke;
‘LA-LAWO RAYA XO DE ŞO’
Tı, verde xo xapnena, dıme ra wazena ma bıxapnê. Ez durıstiya şıma ra şık kena, inam nêkena ‘bıra u wayê mı’! Raya xo de şorê.
Tı, xora ebe hep u huquq, ebe şar u zonê ma ra kay kena. ‘Aqılê’! to ke heni zaf est o, verba inkar u qedexe kerdana zon u kamiya xo vınde. Na derheq ra, ebe Tırki nasihatan danê ma nê ‘baqıli’!
Hem zonê xo nêmıseno, hem bı Tırki ma ra vano, ‘wayirê zonê xo bıvecime’.
Raya xo de şo ‘bıra’ , raya xo de şo wayê!
Ma, bêzar bime no hal u merhalê şıma de.
Zon u kamiye, şeref u heysiyet o.
Şeref u heysiyet, bınê lınganê dewleta Tırki de ro.
Şexsiyetê xo, bınê lıngan de bıge, vece.
İnkar u mantıqê inkarciyan puç bıke. İnkarciyê gewendi nê, tı inan u mantıqê inan bıke bınê lınga xo, pan u puç bıke.
No se beno?
Zonê xo bımıse, qesi bıke, bıwane, bınusne, no, niya beno.
Tı ke niya bıkerê, şexsê xo de, inkar u mantıqê inan qedênena.
O waxt, qesa to, nasihatê to, çımanê mı ser.
O waxt, ez inam kena ke, tı hem xo ra, hem şarê xo ra durıst a.
Bı be ‘wezirê şexs u emrê xo, me be ‘rezilê inkarciyan’. Ma, emrê xo, ebe şanık u zurekeriya zurekeran ra nêviyarnenime .
Naye, wa zê her kesi, şıma ki xo vira mekerê.
Tı ke zonê xo ra hes nêkena, na heskerdene ke inkarci zerê to de veto, qedêno, ‘zanayê to’! mı ra çı?
Tı ke zonê xo nêmısena, nêwazena bımısê, Almankiyê to, Erebkiyê to, Tırkiyê to, Franskiyê to mı ra çı?
Tı ke seba rastiya xo, seba kamiye xo çin a, seba dınya aleme bı bê, mı ra, ma ra çı?
De bê ke rêyna naye mevace;
‘LA-LAWO RAYA XO DE ŞO.’
Zon, şeref u heysiyet o, ferqa mordemi u ferqa hêybanan est o mı va.
Eger ke ‘zanayê şıma wo kıbar’! destur bıdo mı, çiyê de bin vacıme;
Zonê to ke inkarci şexsê to de bıqedêno, tı endi qedina.
Serbestiya şexsê to, serê koka serbestiya kamiye u zonê to de vecino. Dê şorê ju dızd, gewende u fahişeyê Tırkan ra vacê ‘Zonê xo qesi meke’. Şıma zanenê ê ebe çı durşme cuwab danê şıma?
‘Kênê to ra vana, vêyvê, tı fam bıke’.
Çiyê ke ma nusnenime, karê leqe niyê.
‘Fam bıke vêyvê’, ZON, ŞEREF U HEYSİYET O.
İlhami Sertkaya
4-2-2010
