Hezar serran ra dime, bawerîya zerdeştan cêrena ra Kurdîstan. Goreyê Wezaretê Dînî yê Hewlêrî ra, bitaybetî Silêmanîye de endamê zerdeştîye benê zêde. Coka pêşnîyaza wezaretî ya ke sey dîno resmî bêro qebul kerdene û zerdeştî besebikerê îbadetxaneyanê xo virazê.
Nurî Şerîfî serra 2006 Ewropa de Dezgehê Zerdeştan nabî ro. Aşma adare de dezgehî îlan kerdbî ke cêreno ra Kurdîstan. Aşma nîsane Konseya Berz a Zerdeştan Kurdîstanê Başûrî de saz bîye. Tevgero ke Îran û Hindîstan de kî aktîf o, vano ke Kurdîstanê Başûrî de 100.000 zerdeştî estê. Şerîfî ra gore no yew reaksîyonê verba şidetê terorîstanê “Dewleta Îslamî” (DÎ) yo. “DÎ ma rê tena merdene û şidet ard. Zordarîya miletî kerda. Nika wext wextê qederê ma yo”, Şerîf rojnameyê Rûdawî ra va.
Şerîfî ra gore plan beno ke Silêmanî de yew merkez rabibo. Heta ewro şaristananê Herême de semînerî ameyî dayene. Şerîfî ra gore hûmara beşdaran berze bîye. “Bi se hezaran eleqeya xo musnaye û na hûmare bena zêdîye. Tayê kurdî wazenê racêrê kokê xo.” Nika konseye paweno ke hukmat ra destûr bêro dayene. O ra dime zerdeştî wazenê îbadetxaneyanê xo rabikerê: “ateşgeh”, yanî “adirgeh”. Dînê zerdeştan de adir cayêde pîroz cêno.
No taw grûba zerdeştan kultur de eleqedar benê. Şerîfî ra gore tayê hemwelatîyî pê qayîl nêbîyê ke rêxistinanê îslamî ra teber yewna rêxistina dînî karê xo Kurdîstan de biramo, la zerdeştî ancîya karê xo eşkera kenê. “Kurdîstan de dewrê nimiteyîye êdî vîyarta. Ma rîayetê heq û huqûqî kenîme. Eke qanûn hetkarîya ma keno, ma hêvîdar îme ke ma kî bipawo. Heqê pêro dîn û bawerîyan esto ke şar îbadetê xo pê bikero. Ma qerarê xo da. Beno ke DÎ û dormeyê ey ma kişenê. La kiştiş ra teber wijdan û hîkmetê înan çin o. Tersê ma çin o. Ma zanenîme ke zafêrîya kurdan musluman ê. Labelê ma bawer kenîme ke ma besekenîme pîya aştîye de biciwîyîme.”
Zerdeştî kam ê?
Bawermendê zerdeştîye îbadetê Zerdeştî kenê. Bi îhtîmalêde pîl Zerdeşt ÎV seserra 6. de ciwîya. Şerîf ra gore Zerdeşt “hetê Heqî ra nêame rusnayene. O bi xo heyat û dinya ser o fikirîya. Zerdeşt merdimêde kamil bîyo. Seba mi pêxamberêk o, la o felsefeyê xo ano dinya. Kitabê Zerdeştî, Avesta de fikrê ey yenê pêser. Se hebî persê ke ey derheqê Heq, cu, dîn û dinya de pers kerdo. Vateyê Homayî nîyê, la yê însanî yê. Tewr verênan ra yew Zerdeşt bîyo ke vato ‘Tena yew Homa esto’, Ahura Mazda, xeliqnayoxê heyatî.” Şerîf bi xo bawer keno Zerdaşt kurd bîyo. Çi esto ke derheqê ey de zaf çîyî nênê zanayene. Kurdan bawer kenê ke Zerdeşt Kurdîstanê Rojhelatî Wirmê (Ûrmîye) de amebîyo dinya û 77serrîya xo de yew lej de merdo.
Dîn ma rê çareserî nîya! Dînê her kesî xo rê yo, kesî eleqedar nêkeno. Gelo neteweya kurda rê fayde esto yan çinî yo? Zerdeşt kurd bîyo yan fars? Ma rê çî? Kurdî çî bawer kenî bikê la tewr muhîm netewe ya! Verê verkan Kurdîstan yeno
Zerdeşt Kurdîstûn de nîyûmo dunya ma nîzanî kamca ra yû winî eyseno ki hetî Îranî ra tayîn zî vanî Qazaxîstûn. Serrê bîyîşî ci zî nîno zûnayîş tayîn vanî 300 mîlad verî tayîn vanî 6000 mîlad verî. Belkî cuwa verî kurdî zerdeşt bîynî nîzûna lê ewro êzîdî estî alawî estî ehlî Heqî estî nî zî sê zerdeştinê modern î. Şarî Silêmanîy ki qandê kurdayetî benî zerdeşt xwi şaş nêko,zerdeştî û kurdayetî eynî çî nîyî