Wusarî hona nêamebî, mi Munîh de afîşê kayê tîyatroyê kirmanckî (zazakî) dî. Arêyê Kayî. Va ke grûbe turê xu yê Almanya kena, sûke be sûke ebe zonê ma program kena, yena Munîh. Ez Arêyê Kayî rew ra zanen. Ê çand serrî raver amebîyê, mi kayê înû şêr kerd. O waxt keyfê mi pê ame, pê qayîl bîyûne. Ge-gane mordem medyaya sosyale de tayê fragman û skeçûnê înû vîneno. Na fay grûbe ebe programo newe kote tur: Dil. Mi naza no kayo rindek ser o nusnabî.
Herçiqas ke kay ra dime qefelîyabîyî û sewe bîbîye derge, onca alvozê delalî wes bê ke waxtê xo ma de pare kerd. Kar û keda înû çiqas ke muhîm bo, ez van mordemê ke peyê ci der ê, kî honde qîymetin ê. Qayîtê mobetê ma bikerê û sima yê bivînê ke nê kaybazî teyna kaykerdoxê tîyatroyî nîyê. Ê bîyê sefîrê zon û kulturê ma, bîyê temsîlkarê royê Kirmancîye. Hêkatê ke anê ra zon, seke kek Yilmaz vano, werteyê boya Kirmancîye ra yenê. Çi esto ke mîrasê qom û kulturê ma teyna zon û tarîx nîyo, çîyê hurdî yê: amênkerdena mostî, simitena doyî, milqîyê sarê dewe, derdê hêga û malî, boya vaşî, xatirayê baw û kalikû, esqê welat û xerîbîye… Neslo ke ez teder ûne, zafêrîya înû nê çîyû nêzanena. Coka ez minetkar ûne ke kaybazê ma yê delalî zerrî û royê Kirmancîye nîya dîna de kenê vila musnenê ma. Nîya her kes beno wayîrê ju parçeyê nê royî. Wa karê alvozû tim raşt şêro, sola ma dahîna jêde kayû bivînîme.
Bimanê weşîye de, rêça sar û zonê xo de bimanê.
