Weçînitişê parlamentoyê Tirkîya de partîya kurde BDP û partîya tirke AKP zaf serkote vejîya. BDP bi skorê xoyo tewr berzî yê tarîxê kurdan de pêro pîya 36 wekîlî vetî. Heto bîn ra AKP nêzdîyê 50% ê rayan bi 325 parlamenteran girewt û naye ra reya hîrêyîne besekena ke hukmat rono. Hur dimêna (Her dîyan) besekerd ke rayê xo bizêdnê. Partîya komare CHP û rastgirî MHP nêşikîya ke duştê AKP de bivejîyê. CHP têde pîya tena dorê 26% xo rê girewt, MHP kî 13% de mend.
Dêrsim de weçinitiş bi faktorê Kemal Kiliçdarogluyî ra CHP virên ame û henî di wekilî vetî. No peryod de Kamer Genç û Huseyîn Aygun Dêrsim parlamento de temsîl kenê. Namzedê BDP Ferhat Tunçî tena raya BDP girewt, EMEP û çepgiranê Tirkîya yê Dêrsimî dest nêda ey. Enformasyonanê rojnamegeranê cayîyan ra gore çepgiranê Dêrsimî zafêrî raya xo daye CHP. Serekê EMEP kî bi rayanê kurdan Îstanbul de wekil vejîya.
BDP bi 36 wekilan hûmara wekilanê xo 60% kerd zêdîye. Partîye besekerd ke 17 şaristanan de wekil bivejo. BDP Dîyarbekir de 6, Wan de 4, Colemêrg de 3, Mêrdin de 3, Şirnex de 3 û Îstanbul de 3 hîrê parlamenterî girewtî. Eşkerakerdişê nê netîceyî ra tepîya şaristananê Kurdîstanî de şar vejîya teber û na serfirazîye pîroz kerde.
Dêrsim de tayê mîlîtananê BDP hêrişê buroyê CHP kerd û uca (uza) de pêrodayîşêde qijkek vejîya meydan. Ferhat Tunçî reşt ci ke serebût mebo daha girs.
Wekilê BDP nîya yenê pêra:
- Dîyarbekir: Leyla Zana, Hatîp Dîcle, Emîna Ayna, Nursel Aydogan, Altan Tan, Şerafettîn Elçî. BDP Dîyarbekir de 400 hezarî ra zêde ray girewtî û bi 60% ê rayan ra pêro pîya 6 wekîlî kî vetî.
- Wan: Kemal Aktaş, Ozdal Uçer, Nazmî Gur, Aysel Tugluk. Wan de BDP besekerd ke pêro wekilanê xo, 4 teneyî, birusno parlamento. Bi 200.000 rayan û 50% ê rayan, BDP rayê xo kerdê zêde.
- Colemêrg: Selahattîn Demîrtaş, Adîl Kurt, Esat Canan. Colemêrg de kî BDP pêro namzedê xo, 3 teneyî, rusnay parlamento. 80% ê rayê BDP, partîyanê bînan kerdî vîndî.
- Şirnex: Hasîp Kaplan, Selma Irmak, Faysal Sariyildiz. Şirnex de BDP rekor şikna û bi 73% ê rayan bîya partîye juyine (yewine). Şirnex ra BDP hîrê parlamenterî vetî.
- Mêrdin: Ahmet Turk, Gulser Yildirim, Erol Dora. Mêrdin de kî rayê BDP zaf bîy. Bi 61% hîrê wekilî vejîyay. No netîce tarîxî yo.
- Îstanbul: Leven Tuzel, Sirri Sureyya Onder, Sebahat Tuncel. Rekorêde bîn ê BDP Îstanbul de ca girewt. Uca (uza) de BDP 400.000 ra zêde rayî girewtî û hîrê parlementerî rusnay parlamento.
- Elih: Bengî Yildiz, Ayla Akat Ata. Elih de BDP rayê xo kerd zêde û bi 50% di wekilî girewtî.
- Muş: Sirri Sakik, Demîr Çelîk. Muş de na fay di wekilê qeza BDP ra yenê. Bitaybetî Kop û Gimgim de BDP zaf ray girewtî.
- Riha: Îbrahîm Ayhan, Îbrahîm Bînîcî. Riha de BDP rayê xo zêdna û di wekîlî vetî.
- Sêrt: Gultan Kişanak (51.173 rayî)
- Adana: Murat Bozlak (90.315 rayî)
- Agirî: Halîl Aksoy (86.823 rayî)
- Çewlîg: Îdrîs Baluken (28.738 rayî)
- Bidlîs: Husamettîn Zenderlîoglu (58.532 rayî)
- Îdîr: Pervîn Buldan (24.362 rayî)
- Qers: Mulkîye Bîrtane (27.620 rayî)
- Mersîn: Ertugrul Kurkçu (96.964 rayî).
