Cande: Weçînitişê Tirkîya yê 2011

Weçînitişê parlamentoyî yê Tirkîya yê serra 2011 ewro dest kerd ci. DêrsimInfo xeberanê serebûtanê weçînitişî cande pêşkêş keno.

• Saeta 20:00: Na saete de netîceyê weçînitişê parlamentoyê Komara Tirkîya nîya r’ o: AKP 50,7%, CHP 25,5%, MHP 13,2%, Xoserî 6,11%, SP 1,12%, HAS 0,73%, BBP ,071%.
• Saeta 19:38: Şaro kurd weçînitiş ra bi qezencêde girs ra vejîya. Şaristananê Kurdîstanî de însanî teber ra netîceyê BDP pîroz kenê. Mêrdin, Colemêrg, Dîyarbekir, Elih, Sêrt, Bidlîs, Şirnex, Wan, Mûş, Îdîr û Agirî de hedefî amey reştene. Dêrsim, Riha, Adana û Mêrsinî de omidê kurdan hîna nêqedîya ke namzedê xoserî serkote bivejîyê.
• Saeta 19:23: Netîceyê na saete ra gore BDP 29 wekîlan vejena û aye ra resena hedefê xo. Riha, Dîyarbekir, Wan, Dêrism, Çewlîg, Adana û Mersîn de hûmara wekîlan nîya yena pêra: Dîyarbekir 5, Colemêrg 3, Şirnêx 3, Mêrdin 3, Elih 2, Sêrt 1, Bîdlis 1, Wan 3, Mûş 2, Agirî 1, Îdir 1, Îstanbul 3, Riha 1 (pêro pîya 29).
• Saeta 19:15: BDP her şaristanê Kurdîstanî de rayê xo kerdî zêde, AKP 5-10% rayî kerdî vîndî. BDP tena Dêrsim de rayê xo kerdê kêmî. Uca (uza) de faktorê Kiliçdaroglu û bawerîya CHP bi îhtîmalêde girs netîce tesîr kerd.
• Saeta 19:10: Wan de 45 % ê sindoqan ame rakerdene, BDP 49 % û AKP 43 % girewt. BDP Wan ra 3 wekîlan vejena.
• Saeta 19:07: Çewlîg de 45 % rayî amey hûmaritene. AKP 65% û BDP 30 % rayî girewtê. Çewlîg ra AKP 3 wekîlan cêna.
• Saeta 19:03: Dîyarbekir de netîceyê 20% ê sindoqan ra gore BDP 65 % ra 5 wekîlî û AKP 30 % ra 6 wekîlan vejena.
• Saeta 19:01: Netîceyo nikayên ra gore AKP 50% ra zêde rayî girewt, CHP weçînitiş de zaf kerd vîndî sirf 23% yê rayan girewtî. MHP baraj ra vîyart, BDP 30 wekîlî vetî. Bi no netîce AKP û BDP weçînitiş ra serkote vejîyay. Dêrsim ra CHP di wekîlî vetî.
• Saeta 18:48: Îstanbul 1 de 10% yê sindoqan amey rakerdene, Sebahat tTuncel reyna bîye wekîle. Îstanbul 2 de endamê BDP Sirri Sureyya Onder rakerdişê 10% ê sindoqan ra tepîya reyna beno wekîl. Îstanbul 3 de kî 10% ê sindoqan amey rakerdene, namzedê BDP Levent Tuzel bi no netîce beno wekîl.
• Saeta 18:42: Dêrsim de 30% sindoqî amey rakerdene. CHP% 55, Ferhat Tunç 23%, Akp 17%. Bi no netîce CHP Dêrsim ra di wekîlan vejeno.
• Saeta 18:36: Texmîno newe yê weçînitişî: Akp 55%, CHP 19%, MHP 12, BDP 7.
• Saeta 18:27: Mêrdin de 31.000 rayî amey hûmaritene: AKP: 9934, MHP: 55, CHP: 2058; Ahmet Turk (xoser): 7895, Erol Dora (xoser): 4685, Gulser Yildirim (xosere): 3561, Suleyman Bolunmez (xoser): 2456.
• Saeta 18:15: Dêrsim de heşt sindoqî amey rakerdene, netîceyî nîya r’ ê: CHP: 687, Ferhat Tunç: 400, AKP: 136, MHP: 14, TKP: 5, DP: 3, SP: 3, DSP: 3, MP:2, BBP: 2, HAS Parti: 1
• Saeta 18:02: Weçînitişê parlamentoyê Tirkîya bi hawayêde resmî reşt peynîye.
• Saeta 17:51: Dêrsim qisle de sindoqanê 1006, 1007 û 1008 de kontrolê delegasyonê îtalyanî nêame kerdene. Mazgîrd de xeylê eskeran dormeyê mekteb û sindoqan girewt. Pilemurîye û Qisle de serekê sindoqan kokiman ra va ke raya xo bidê CHP.
• Saeta 17:28: Dewa Musa Anterî yê Mêrdim de BDP 979 û AKP 41 rayî girewtî.
• Saeta 17:04: Dewa Hemedî Qesra Qenco de namzedê suryanî yê BDP rê 972 rayî vejîyay. AKP sifir ray de mend. Dewa Direklî de kî BDP 470 rayî girewtî, AKP ancîya (onca) sifir girewt.
• Saeta 16:54: Qilaban de polîsî kot mekteb û waşt ke sindoqan bi xo bihûmaro. Sebebê na xebera ra şar ame mekteb, polîs kî mecbur mend ke mekteb terk bikero.
• Saeta 16:34: Dewa Bidlîsî Tutu de çawuşê cendirmeyî pêro muşahîdî mekteb ra eştî teber û va ke o hûmaritiş tena keno. Naye ser o endamê BDP kotî ra raya Tutuyî.
• Saeta 16:10: Wan de polîsî hêrişê şarî kerd, 15 kesî amey zere eştene. Polîsî dormeyê mektebî girewt, meselade qijkeke ser o hêrişê miletî kerd, tayê berdî bi hepis.
• Saeta 15:50: Çewlîg Kanîreş de namzedê AKP Şahîn Bîngol û merdimanê (mordemanê) xo eşîra xo bi çekan ra tehdîd kerd. Seba ke eşîra ey torinan raya xo zêderî da blokê kede, aştî û demokrasî, o û merdimê (mordemê) ey çekan dest de fetilînê. Polîs vîrênîye ro ey nêcêno.
• Saeta 15:42: Mazgêrd de kî jê (sey) Pilemurî û Qisle de raydayîş rakerde ame kerdene. Esker û qorîcîyan hêrişê ê kesan kerd ke duştê naye de vejîyê.
• Saeta 15:37: Çewlîg de serebûtî dewam benê. AKPyijî wazenê ke rayan rakerê û bierzê. Muşahîdanê BDP ke destûrê naye nêda, tayê cayan de rastê hêrişî bîy ya kî bi çekan amey tehdîd kerdene. Qezaya Sancakî de dewa Sudugunu de muşahîdê blokê kede, aştî û demokrasî hetê tayê AKPyijan ra amey hêriş kerdene. Halîm Barcadurmuş, Abdurrahman Barulay, M. Emîn Barulay û Alatîn Batur naye de bîy dirbetinî.
• Saeta 15:25: Dewanê Pêrtage de mekteban de ke tede ray yena dayene, posterêde girsî yê Kemal Kiliçdarogluyî ame darde kerdene. Sireyo ke BDPyijan waşt ke nê posterî wedarê, eskeranê tirkan naye nêverda.
• Saeta 15:22: Wan de di sindoqî amey rakerdene, 99% ê rayan amey dayene bi BDP.
• Saeta 15:13: Xeylê taxanê Dêrsimî de pisûlayan ser o cayê nameyê Ferhat Tunçî hetê CHPyijan ra birnayene û nîya şarî rê bîyê vila. Seba ke dewijan nameyê Tunçî pisûla de nîdîyo, ê şîyê gerre kerdo.
• Saeta 15:11: Dêrsim de hîleyêde girs: dewa Çemîşgezekî Payamduzu de serekê sindoqê pêro rayî eştişê pisûlayan ra ver kontrol kerdo. Raver ra vato ke weçînitoxî raya xo bidê CHP.
• Saeta 14:55: Elih de polîsî dormeyê sindoqan canêverdanê. Qanûn ra gorê gerek polîsî tewr tay 10 metreyî sindoqe ra dûrî vindê. Jê (sey) Elih, xeylê şaristan û qezayanê Kurdîstanî de esker û polîsî yenê nêzdîyê sindoqan û tedaya psîkolojîke virazenê ke weçînitoxan bitersnê. Elih de 20 kurdan ke waşt raya xo bidê blokê kede, aştî û demokrasî, amey berdene bi qereqol.
• Saeta 13:45: Henî aseno ke Dêrsim Mamekîye de xeylê kesan raya xo daye Ferhat Tunç. Pilemurîye de CHP bi ferqêde qijkek virênî der a. Tayê dewanê Pilemurîye de hetê serekanê sindoqan ra propaganda beno ke dewijî raya xo Ferhat Tunçî rê ney, wa bidê CHP.
• Saeta 12:33: Dêrsim de namzedê CHP Kamer Genç ame protesto kerdene. Kamer Genç ke ewro sûka Mamekîye de verê dayîreyê beledîya de fetilîyo, sebebê qiseykerdişê xo “dêrsimijî tirk lajê tirkî yê” ra, hetê xeylê cêncan ra pers bîyo. Cêncan dormeyê Gençî girewt û ey ra qiseykerdişê xo pers kerd.
• Saeta 12:22: Sûka Çewlîgî de çêberê (keyberê) mektebî hetê polîsan ra amey girewtene. Qezaya Ilicalar de verê çêberê (keyberê) mektebî de serekê AKP yê a qeza Gîyasettîn Kocîyayî miletî ra va ke raya xo bido AKP. Muşahîdê blokê kede, azadî û demokrasî Yunus Gorbeyî hetê AKPyijan ra ame hêrişkerdene. Gorbey dirbetin ame berdene bi nêweşxaneyê Çewlîgî.
• Saeta 12:17: Çewlîg de her ca de hîleyî yenê dîyene. Virênîye ro muşahîdanê BDP yena girewtene. Dewa Saban de qomutanê qereqolî leyê sindoqe de nişt ro û va ke her kes raya xo rakerde bido. Kontrolkerdoxanê îngilîzan no serebût not kerd. Çewlîg de sîyasetkaranê AKP waşt ke raydayîş rakerde bêro viraştene, la muşahîdanê BDP naye rê destûr nêda. Aye ser o muşahîdî rastê hêrişî bîy. Ju (yew) muşahîdê BDP giran bî dirbetin.
• Saeta 11:34: Tayê sindoqanê Dêrsim û Motkan de rayê ê weçînitoxan ke wendiş nêzanenê, hetê serekanê sindoqe ra Dêrsim de seba CHP û Motkan de seba AKP amey dayene.
• Saeta 11:30: Yeno dîyene ke polîsê tirkî pêro şaristananê kurdan de, mekteban de serê sindoqan de, zor ro şarî keno.
• Saeta 11:28: Mersîn de muşahîdê partîya BDP hetê polîsan ra mekteb ra ame berdene bi qereqol.
• Saeta 11:24: Îzmîr de xeylê pisûlayî bi muhrê AKP ju (yew) erebe de amey dîyene. Şofor kî ame berdene bi qereqol.
• Saeta 11:13: Melumatan ra gore tayê dewanê Pilemurîye de rayî raver ra amey kontrol kerdene. Tayê serekanê sindoqe vatê ke wa weçînitoxî raya xo bidê CHP
• Saeta 11:01: Sêrt de hîlekarîya weçînitişî: Polîs verê mekteban deweçînitixon îqaz keno ke mekuye zere. Tayê serekê sindoqan ê BDP kî nêamey zere verdayene.
• Saeta 10:43: Ercîs de serekê sindoqe weçînitoxan rê ke besenêkenê biwanê, înan rê amblemê AKP musnenê û vanê ke wa ê raya xo bidê AKP.
• Saeta 10:32: Bajerge (Colgemêrg) de polîsî weçînitioxan ancenê (oncenê) kamera ra.
• Saeta 10:30: Patnos û Bazîd de hîleyê weçînitişî: sermîyanê sindoq ê BDP besenêkeno ke bikuyo zereyê mektebî.
• Saeta 10:23: Komela Heqanê Însanan a Amedî ra Racî Bîlîcî da zanayene ke xeylê mebteban de polîsê tirkî mudahale kenê û ke xeylê ca de îxlalê weçînitişî esto. Polîsî nêwazenê ke mektebî bibê pirr.
• Saeta 10:19: Riha, Konya û Dîyarbekir de hîleyê giranî: Dîyarbekir de taxa Baglarî de mekteban de polîs verê sindoqan de nişeno ro û tesîrêde xirabino psîkolojîk dano weçînitoxan ser o. Konya de wezîfedarê sindoq ê BDP mekteb nêame zere girewtene.
• Saeta 10:18: Ahmet Turk raya xo xo rê ney, dewa Derikî de seba namzedê suryanî Erol Dora da.
• Saeta 10:16: Sermîyanê sindoqe Alî Işikî dewa Yagizcanî ya Çewlîgî de rayî raver ra dîyê û kontrol kerdê. Komîsyonê weçînitişî na xebere ser o kot raye.
• Saeta 10:15: Çewlîg Pali de sermîyanê sindoq ê BDP ame teber eştene. Badê ke BDPyijî amey uca (uza), ey kî besekerd ke zere kuyo. O mabên de zereyê mektebî de tam se bîyo, nêno zanayene.
• Saeta 10:00: Qezaya Dîyarbekirî Bismîl de serekê sindoqe zerfê xo eşto ci. Na xebere ser o xeylê seyrkerdoxî leyê ey de amey pêser.
• Saeta 9:00: Weçînitişê parlamentoyê Komara Tirkîya resmî dest kerd ci.