Wan de ewro zelzeleyo giran de 85 ra zêde kesî merdî û bi hezaran kesî bîy dirbetin. Heta nika hûmara pêro merde û birîndaran hîna bellî nîyo.

Wan de saeta 13:41 de bi şidetê 7.2 ju (yew) erdlerz (hardlerz) qewimîya. Erdlerzo (hardlerzo) giran heta Colêmerg, Bidlîs, Agirî, Erzirom, Mûş, Dêrsim, Elih, Riha, Şirnex, Mêrdin, Sêrt û Dîyarbekir ame hîs kerdene. Qezaya Wanî Ercîşî zeraro tewr girs girewt, bi hezaran banî (bonî) rijîyay û heta nika 85 meyîtî amey dîyene. Xeberan ra gore hûmara merdeyan saete bi saete bena tenêna berze. Tayê texmînan ra gore mabênê 500 û 1000 de kesî na trajedî de dinyaya xo vurnaye. Şaristanan de kî elektrîk û awe birîyayê.

Heta na saete şar bi sereyê (sareyê) xo û ardimê beledîya ceribneno ke duştê netîceyê zelzeleyî de tedbîran bicêro. Hîna dewlete ra ardimî cayê erdlerzî (hardlerzî) nêreşt. Wekîlê BDP yê Wanî Ozdar Ucerî naye ser o nîya qisey kerd: “Na dewlete ke ju (yew) pêserameyîşê rojnamegeran de lerze-lerze bi hezaran polîs û tankan rusnena, nika xo lanê (lonê) de darena we ke duştê nê krîzî de dest pêbicêro. Xeylê banî (bonî) rijîyay û binê ê banan (bonan) de xeylê însanî estê. Şar ceribneno ke bi xo dirbetinanê xo binê kemer û kuçan ra vejo. Kam ke vejîno, ardim keno ke êyê bînî kî bivejîyê.”

Na linge de beledîyaya şaristananê cîranan û Aşma Sûre ardim kenê û malzeme rusnenê. Xeylê kesî kî bi xo şîy nişt erebeyanê xo ke betanîya û kincan biberê ya kî mileto bêçê (bêkeye) bîyarê meyman bikerê.

Kam ke wazeno ardim bikero, besekeno nê numreyan rê telefon rakero:

Ardimo Verên ê Wan û Numreyê Krîzî:
+90-432-226-75-00
+90-505-869-59-59

Nêweşxaneyêî Perwerde û Cigêrayîşî ya Wanî:
0-432-217-76-00

CEWAB BIDE

Keremê xo ra şîroveyê xo binuse
Keremê xo ra nameyê xo binuse