Spanya tarîxê xo de reya verêne bîye şampîyona futbolî yê dinya. Almanya ra dima kî Hollanda bi (ebe) skorê 1:0 wextê dergkerdene de eşte cayo dîyin. Spanya ke bi no skor ra di serran ra ver şampîyonîya Ewropa  girewtîbî, nika kî xelata şampîyonîya dinya girewte. Hollanda reya çarine yew (ju) fînalê kupayê dinya de besenêkerd ke şampîyon bibo.

Leteyo yewin (juyin) de Spanya bi kayê xoyo klasîkî yê pasanê kilman bi sebr û bi teknikêde berz maç zaf rind ard binê kontrole xo. Hollanda semedê taktîkê Spanya ra vejîya. Aye ra leteyo yewin de henî kayêde rind nêvejîya meydan. Ekîbê Spanya waşt ke sey (jê) kayanê verênan bi teknîkêde berz û sebr şêro kaleyê Hollanda het, labelê kayê çetinî yê Hollanda planê Spanya kerd têwerte ro.

Deqaya verêne de destê ekîbanê dîyemîne nêşîy yewbînî, henî bê kontrol leteyanê xo kay kerdî. Di-hîrê pozîsyonan ra sirf leteyo yewin de çîyê nêbî. Hollanda zaf faul kerd û no semed ra heşt futbolbazê Hollanda karta çeqere û yewê kî karta sûre dîye.

Leteyo dîyin de Hollanda tenêna xo ra emîn vejîya meydan. Hebike mend ke bi Spanya deqaya 48. û deqaya 55. de şêro virênî. Heto bîn ra Hollada kî deqayanê 52. û 62. de besenêkerd ke şanşê xoyê rindî biçarnê gol. Deqaya 70. de Vîlla û deqaya 77. de Ramosî nêşîkîya ke ekîbê xo rew bîyarê ver. 90 deqayî têduşt vîyart û maç ame dergkerdene.

Deqaya 116. yê wextê dergkerdene de belkî futbolbazê tewr rind ê na turnuva Înîestayî bi hunerêde girs golo rindek ê Spanya eşt û peynîya peynîye de Spanya kerde şampîyona dinya yê 2010. Hewt deqayan raver de kaykerdoxê Hollanda Heîtîngayî karta sûre dîye û maç ra vejîya.

Peynîye de Spanya no maç heqe kerd û şarê xo rê xelatêda rindeke daye. Bi mîlyonan spanyolî tepîya vejîyay teber û no netîce bimbarek kerd.

Antronerê Spanya del Bosqueyî maç ra tepîya vat, “Maçêde zaf zor bî. Hollanda zaf çetin kay kerd. Talîyê ma esto ke ma de xeylê futbolbazê rindî estê. Teyna skor ney, gerek ke merdim (mordem) kayêde rind bivejo. Ma na turnuva de kayêde rinda rind vet û nika zaf benîme şa.”

_______

(*) Wa biciwîyo Spanya!

CEWAB BIDE

Keremê xo ra şîroveyê xo binuse
Keremê xo ra nameyê xo binuse