Hunermendê hewt welatê Ewropa vera barajê ke Mizur de yenê viraştene, bi (ebe) yew (ju) nûmayîş ra protestoyê xo kerd. Des û panc (ponc) hunermendanê Almanya, Yunanîstan, Fransa, Katalanya, Tirkîya û welatanê bînan roja 09.07.2010 dest bi aksîyonê xo yê ke des rojî dewam kena, kerd.

Pîrê Mutu ra hunermendî kotî (kewtî) raye. Roja pancine de raywanî amey sûka Mamekîye. Uca (uza) de xeylê dêrsimijan ê bi slogan û heskerdiş bimbarek kerdî. Berpirsîyarê na proje Tere Recar Ens bi ziwanê (zonê) dayîka xo katalankî qisey kerd. Recar Ens vat ke o qeseyê xo bi spankî ney, la bi ziwanê xo yê  dayîke katalankî keno, gerek ke her kesî nîya qîymetê ziwanê may û pîyê xo bizano. “Ez zanena ke însanê Dêrsimî kî sey (jê) awa Mizurî ke henî xoser şona, yê. Însanê nocayî (nazayî) weş û xirt ê. Eke tîya (îta) awbendan bivirazîyê, însanê tîyayî êndî (êdî) xoser nîyê, xirt nêbene, weş nêbenê, ê benê sey golêda awbendî ke cayê xo de vindena, nêweş û pasîf a. No rî ra hîna herey nîyo, şarê Dêrsimî heta qewetê xoyo peyênî vera aye de bigurîyo. Eke baraj bêro Dêrsim ser, rindekîya Mizurî û xirtîya însananê Dêrsimî qedêna.”

Almanya ra Kerem Ozcanikî no esna de qisey kerd va, “Mizur de ê wazenê ke hewt awbendan bivirazê, nê projeyê barajan tewranê bîyolojîkî yê Mizurî kenê xirabinî û înan qedênenê. Ma Mizur de awbendan nêwazenîme, gerek ke ma vera înan de bivindenîme.”

Raywanî hîna kotî raye û proje Çimeyê Pulurî de anê peynîye. Raye de hunermendî xeylê vîdeoyî antî (ontî) û roportaj kerd. Nê vîdeoyan tepîya benê yew fîlmê dokumentarî.