Melumatanê verênan ra gore rojhelatê Ukrayna de yew teyaraya Malaysian Airlinesî ameye piro dayene. 295 raywanî tey kişîyay.
Goreyê wezaretê karanê zereyî yê Ukrayna ra teyara bi roketan ra dîyaye kewtene. Goreyê ofîsê wezaretî “na trajedîya hîrêyin a ke rojanê peyênan de qewimîyaya.” Verê, yew jetê artêşe û yew teyara neqlîyatî yê artêşa Ukrayna “hetê dewleta Rûsya ra” amey piro dayene.
Çi esto ke Rûsya ra ame dayene zanayene ke teyara hetê hêzanê Ukrayna ra ameye warardene. Goreyê serekkomarê Rûsyta Vladîmîr Putînî ra Kîev berpirsîyar o: eke Ukrayna rojhelatê welatî de hêriş nêkerdêne, no felaket nêbîyêne. Duştê ci de, serekkomarê Ukrayna Petro Poroşenkoyî va ke no karê terorîstan o: berpirsîyarîye yê separatîstanê urisan o. Goreyê Poroşenkoyî ra guna artêşa xo çin a. Eke nê melumatî rast ê û yew hetê krîzê Ukrayna sebebê kewtişê teyara yo, no serebûto tewr fecî yê krîzî yo. Seba ke hîna her çî eşkera nîyo, asayîşê teyara yê Yewîya Ewropa (YE) kewtiş sey qeza name kerdo. Cigêrayîşî hîna dewam benê.
Cayê kewtişî de kesî ranêxelisîya. Goreyê ajansê xeberan AFP ra bi desan cendegî mabênê parçeyanê teyara de amey dîyene. Ame dayene zanayene ke teyara berzîya 10.000 metreyan de hetê yew roketê sîstemê Bukî ameye piro dayene. No sîstem hem Rûsya hem kî Ukrayna de esto. Nê tewir roketî resenê berzîyanê 22.000 metreyan.
Krîzê Krîmî yê nîsane ra dime, DYA û YE wareyê hewa yê mintiqaya rojhelatê Ukrayna qedexe kerdîbî. Labelê sînor normal de tehlukeyin nêbî, çike pêrodayîş erd de ca gênê, hewa de ney. Her roje dorê 700 teyarayî mîyanê Ewropa û Asya de raywanîye kenê. Nê teyarayê ke berzîya 10 km der ê, tena bi sîstemê rokatan ê averşîyaye yenê warardene.
Seba şîrketê teyarayan ê Melezya na trajedîya dîyin a çend aşman a. 8. adare de yew teyara ke Kuala Lumpur ra şîyêne Pekîn, bîya vîndî. Herçiqas de gêrayîşê teyara gêrayîşo tewr girs ê tarîxî bî, 239 raywanî û teyara hîna nêamey dîyene.
