Serra 1812 de artêşa Fransa ya Napolyonî ke da çêberê Moskova ro, her kes bawer kerdbî ke Napolyon mabênê hefteyan de hardê Rûsya bicêro xo dest. Labelê herb hefteyan de nêqedîya. Artêşa Rûsya herb kerd derg, leşkerê Napolyonî qefelîyayî, bêzar bîyî, xeylêyê ci canê xo dayî, tayê serd de cemedîyayî. Û urisan Napolyon heta Almanya perna.
Napolyon ra 129 serrî tepîya na rey kî Hîtler û mordemê zê ey talîyê xo cerebna. Na rey kî her kesî fîkr kerd ke nazîyî destê hefteyan de poştîya Rûsya siknenê, la henî nêbî. Herb ancîna bî derg, almanan kî qederê Napalyonî pare kerd. Eskerî be dergbîyena nê herbî duştê cemed, serd, sebr û wextî kerd vîndî. Urisan ancîna ebe dergkerdena herbî dismenê xo xo ra bêzar kerdî. Reya dîyine no taktîk raşt vejîya.
Rûsya no taktîk Sûrîye û Ukranya de ke gurenena. Sûrîye de game be game bê lerze Esad kerd xurt, nefesê îslamîstan birnayî. Ukranya de ke stratejîya artêşîya Rûsya rind nêgureya, na rey taktîkê dergkerdena herbî ser ameyî. Rûsya rind zaneno heta ke herb Ukranya de bî derg, endamê koalîsyonî kî ney ra bêzar benê. Nê semedî ra beno ke herbo derg semedê Ukranya rind nêbîyo. Herbo derg Ukranya rizneno, motîvasyonê mutefîkanê xo keno zar û destê Rûsya keno pêt. Dersa tewr muhîme seba Ukranya tedarîkkerdena çekan ney, wexto kilm de qedenayîşê herbî yo.
