Nêmfînalê Confederations Cupî de ekîbê milî yê Spanya û Îtalya amey têlewe, penaltî ra tepîya Spanya bi 7:6 vejîya fînalê turnuva. Xora roja verêne de Brezîlya rê raya fînalî asaye, yanî reqibê Brezîlya ame gêrayene.

Maç Fortaleza de bî, hewa zî germ bî. Îtalya ke kayo vêren verba Brezîlya de kerdbî vîndî, na fay waşt ke qewetê xo bimusno dinya û Spanya turnuva ra teber bierzo. Spanya sey her wextî favorîyê kayî bî.

Esnaya maçî de îtalyanan spanyolan ra tenêna rind dest pêkerd, Spanya nêeşkîya ke kayê xo yo ke sey “tîkî-taka” name beno, kay bikero. Îtalya pozîsyon dima pozîsyon dî, labelê înan besenêkerd ke golê bierzê.

Peynîya nêmeyê yewenî de ekîbê Spanya pozîsyonê xoyo verênî vet, goleştoxê spanyolan Fernando Torres reqibanê xo ra xelesîya, labelê şutê ey kale ra vîyart ra.

Nêmeyo diyin de zî maç nêvurîya, Îtalya Spanya ra kayêde hîna rind musna û înan rê xeylê pozîsyonî vetî, la golo ke dima waşt, nêame. Semedê germî ra futbolbazî rew bêtaqat mendê, gamê înan bîy sistî. 90 deqayan de seyrkerdoxan yew gol nêdî û maç bî dergaderg.

Tayê îmkanê goleştişî kî esnaya 30. deqayanê panayîşî de vejîyay, la ancîya kes besenêkerd ke golê bierzo, no semed ra maç penatlî rê mend. Kaleyê Îtalya de Buffon, yê ekîbê Spanya de zî Casîllas bî. Her di kalevanî cayê xo de tewr rindê dinya yê.

Peynîya na penaltî de Spanya maçî verê Îtalya de bi 7:6 xo rê girewt, şutê Bonuccî kale ra vîyart ra, dima Navas şutê xo eşt û Spanya rê raya fînalî kerde ra.

Fînal roja 01. temmuze de ca gêno.

1 ŞÎROVE

  1. Sima na xebera spori ebe kirmancki yo zof zelal nusno, bravo. Lewe mide Kirmance Amed u mi na xebere wend me u pewre fehm kerd. Ebe “standardîzekerdise nerm” yaki “standardazizasyine game u game” mak ney museme. Yani xafilde standardizasyon ney, prosesan rindo. Emege sima ser wes be.

Comments are closed.