Pîlê kirmancan Şêx Seîd bi munasebetê serrgêra 86. ya merdişê xo emser hetê miletê kurdî ra ame yad kerdene. Şêx Seîd 29. hezîrane 1925 de hetê Komara Tirkîya ra ameybî darde kerdene.
Amed de nimajo sîvil de Şêx Seîd û hevalê ey amey yad kerdene. Cayo ke Şêx Seîd 86 serran ra ver ameybî dare eştene, uca (uza) 5.000 kurdî amey têlewe û nimajê xo kerd. Xutbeyanê kurdkî de kî qalê Şêx Seîdî ame kerdene. Dêsan ser o kî posterêde girs ê Şêx Seîdî ame darde kerdene.
Aye ra kî dot Dîyarbekir de seba Şêx Seîd, Feqîye Teyran, Melayê Cîzîre, Ehmedê Xanî û Saîdî Nursî mewlidê kirmanckî û kurmanckî (kirdaskî) amey wendene. No mewlid de kî wekîlê BDP Algan Takî cayê xo girewt.
Şêx Seîd serra 1865 de qezaya Erziromî Xinis de ameybî dinya, eslê xo ra Pali ra yo û jê (sey) serekê hereketê îtîqad û neteweyê kurdan kot kitabanê tarîxî. Xoverdayîşê Şêx Seîdî yê serra 1925 de hem motîvê neteweperwerîye hem kî êyê dînî estbîy. Hereketê Şêx Seîdî hetê rêxistina welatperwere Azadî ameybî amade kerdene. Peynîya îsyanê Şêx Seîdî de o û 47 hevalê xo hetê artêşa tirke ra amey darde kerdene. No hewte xeylê cayanê Kurdîstanî de Şêx Seîd û hevalê xo yenê yad kerdene.
