Înstîtutê Ziwan û Kulturê Kirmancan (Zazayan) – ÎKK e. V. Berlinî ju (yew) kitabê domanan bi di zonan (ziwanan), bi kirmanckî û almankî, da çap kerdene. Kombîyayîşê roja 22.06.2011 de serekê ÎKK Lerzan Jandîlî hem derheqê kar û gureyê ÎKK de, hem kî derheqê nê kitaban de melumatî day endaman.

ÎKK bitaybetî neşrkerdişê kitabanê domanan bi kirmanckî ser o vindet. Naye ser o qalê çarnayîşê sanika almane “Der gefräßige Wurm” kerd. Na sanike verê almankî ra hetê Alan Dilpakî ameye çarnayene kurmanckî ser, dima nuştox Lerzan Jandîlî kî kurmanckî ra çarna ra kirmanckî (zazakî), sanike kî bi nameyê “Kermo Çimvêşan” vejîyaya. Sanika “Kermê Çimvêşanî” bi di zonan (ziwanan), bi kirmanckî û almankî ameye çap kerdene û hetê ÎKK û Yewîya Malbatanê Kurdî Yekmal Berlîn ra ameye weşanayene.

Leweyê kitabî de kî ju (yew) CD esto ke tede sanike yeno wendene. Wendişê kirmanckî Lerzan Jandîlî, yê almankî kî Roswîtha Deutsch kerd. Seba domanan kî tede parçeyê kitabî yo bêreng esto ke domanî bişikîyê tey boyax bikerê.

Aye ra kî dot, goreyê vatena Lerzan Jandîlî henî plan beno ke “Kermo Çimvêşan” çapa dîyine de kî bi kirmanckî-tirkî bigino çape ro. No kitabê domanan “Kermo Çimvêşan” demêde kilm de kî juna (yewna) kombîyayîş Berlîn de yeno nas kerdene. Nika ra kitab sipariş beno.

Adresa waştişî:

Das Institut für Sprache und Kultur der Kirmanc (Zaza) – IKK e. V.
Cuvrystraße 13 / 14, 10997 Berlin

E-maîl:

institutekirmanci@hotmail.de
lerzan@kirmancki.com