Emser serrgêra qirkerdişê Sêwasî bi (ebe) pêserameyîş, mîtîng û programanê bînan yeno yadkerdene. 17 serran ra tepîya hîna xeylê qetilî nêamey pêgirewtene û tayê hîna Ewropa de weşîya xo ramenê. Serekê PSAKD Fewzî Guneşî vano ke, “Berpirsîyarîya nê qirkerdişî hîna eşkera nêbîya. Dezgehê dewlete hîna nêamey edalet ver. Çi heyf o ke Madimak hîna nêçarîya muze.”

Fewzî Guneş nê persan ard ziwan (zon): “Heykelê hunermendî nê nijadperestî, cademendeyî, şerîatperwerî û faşîştan hard (erd) ra kaş kerdî, înan no cesaret kotî ra cênê? Dewlete û hukmat çayê vera nê qirkedişî de bêveng bî? Peynîya nê qirkerdişî serekkomarê Tirkîya vat ke, ‘Şukur bo ke şarê ma rê tebayê (towa) nêbî’, na yena a mana ke dewlete no kiştiş qebul kerdo. A roje ra bi nat 17 serrî vêrdî ra û hukmatî no ca hîna muze nêkerda.”

Guneşî qeseyê xo de vat ke dewleta Tirkîya wazena ke şarê xo ra kincanê tirk û îslamî pay bikero, labelê êndî (êdî) na polîtîka raya xo ra vejîya. No sîyaseto kan û nîjadperest o. Gerek ke Tirkîya de her kes nasname û kulturê xo xoser û bi tewirêde demokratîk biramo.

Sêwas de 2. temmuza 1993 de hîris û panc (ponc) roşnvîr, hunermend û nuştoxî rastê hêrişê merdimanê (mordemanê) faşîştan ê dewleta xorîn amey. Ê pêro amey veşnayene. No pêserameyîş ra tepîya xeylê kesî Konya û Qeyserî ra amey Sêwaz. Yew (ju) roje raver beledîya seba viraştişê raye xeylê kemerî ardî nêzdîyê otelê Madimakî de nay ro.

Qirkerdişê Sêwasî xafil de nêbî, eksê ey de bi plan û proje ame viraştene. 3. temmuze de 5.000 kesî amey dormeyê otelê Madimakî û uca (uza) de bi bêtel polîsan va ke, “Nika kemeran erzenê, se bikerîme?” Komutanê înan vat, “Fehm kerd, pêşkarê ci mebê.” No komutan serekê asayîşê Sêwasî, Dogukan Oner, bî.

Zereyê otelî ra her kesî pêro nasê xo yê Ankara rê telefon kerd waşt ke înan rê destek vajê. Cewabê înan, “Metersê, ma no problem hal kenîme.” Ardimkerdoxê serekî û serekê partîya CHP Erdal Înonî kî Azîz Nesînî ra vato ke, “Meterse, nika ma şima rê eskeranê bînan rusnenîme, kesî re çîyê nêbeno, meterse.” Saetî vîyarnayî, hama ne kesî dest da ci ne kî eskerê bînî amey. Saeta newine de kesê ke verê Otelî de vindetêne, heykelê Pîr Sultan Abdalî cayê xo ra vejenê û hard ra kaş kenê şiknenê.

Saeta 19:45 de şarê Sêwasî na rey tomofîlê ke verê Otelî de parkkerde bîy, înan veşnenê. Heta saete newine 35 kesî semedê veşnayîşî ra yenê kiştene. Berpirsîyaranê nê qirkerdişî 3-4 serrî ceza girewt, tayê rew hepisxane ra vejîyay, tayê remay şî, bîy vîndî. Çîyêde balkêş o bî ke şeş hezar eskerê ke kumandanîya Tuga yê Sêwasî de nêzdîyê Madimakî de bîy, dest nêna serebûtî ra.

A roje nê canî şîy rehmet:

Muhîbe Akarsu, 35 serrî, cinîya Muhlîs Akarsuyî bîye
Muhlîs Akarsu, 45 serrî, hunermend
Gulender Akca, 25 serrî
Metîn Altiok, 52 serrî, şaîr, nuştox
Ahmet Alan, 22 serrî
Mehmet Atay, 25 serrî, rojnameger
Sehergul Ateş, 30 serrî
Behçet Aysan, 44 serrî, şaîr
Erdal Ayranci, 35 serrî
Asim Bezîrcî, 66 serrî, nuştox, cigêrayox
Belkîs Çakir, 18 serrî
Serpîl Canik, 19 serrî
Muammer Çîçek, 26 serrî,  kaybaz
Nesîmî Çîmen, 62 serrî,  deyîrbaz
Carîna Cuanna, 23 serrî, rojnamegera hollandayije
Serkan Dogan, 19 serrî
Hasret Gultekin, 26 serrî, şaîr, deyîrbaz
Murat Guneş
Murat Gunduz, 22 serrî
Gulsum Karababa, 22 serrî
Ugur Kaynar, 37 serrî, şaîr
Asaf Kocak, 35 serrî, karîkaturîst
Koray Kaya, 12 serrî (şehîdo tewr genc)
Menekşe Kaya, 17 serrî
Handan Metîn, 20 serrî
Saît Metîn, 23 serrî
Hurîye Ozkan, 22 serrî
Yeşîm Ozkan, 20 serrî
Ahmet Ozyurt, 21 serrî
Nurcan Şahîn, 18 serrî
Ozlem Şahîn, 17 serrî
Asuman Sîvrî, 16 serrî
Yasemîn Sîvrî, 19 serrî
Edîbe Sularî, 40 serrî, deyîrbaze
Încî Turk, 22 serrî
Kenan Yilmaz, 21 serrî

CEWAB BIDE

Keremê xo ra şîroveyê xo binuse
Keremê xo ra nameyê xo binuse