Zafane henî zanîno ke Çîn welato peyên ê komunîstan o. Labelê melumatê neweyî musnenê ke Çîn de kî sîstemê komunîzmî bêqusur nêbeno. Resimo ke heta nika hetê serekanê çînijan ra vila bîyo, nîya bî: Merdim gerek xebatkar û welatperwerêde mutewazî bo. Serekwezîr Wen Jîbaoyî hertim vatîbî ke “keyeyê xo zar feqir” bî. Ey her rey waşt ke xo nêzdîyê elçî û hemwelatîyanê xo bimusno. Seba naye her dem bi şaro belengaz ame têlewe û înan de qisey kerd.
Labelê peyê perdeyan henî nîyo. Xebera rojnameyê New York Timesî (NYT) ra gore Wen Jîbao û hetkaranê xo 2,7 mîlyar ra zêde pere arê kerdî. Vejîyayîşê na xebere ra dime hemen keyepelê NYT hetê dewleta Çînî ra sansur bî.
Binê manşeto girs “Billions in Hidden Riches for Family of Chinese Leader” (Seba Keyeyê Serekê Çînijî bi Mîlyaran Milkîyet Nimite) de rastîya bîn a Wen Jîbaoyî ameye eşkera kerdene. A xebere ra gore Jîbao û xisimê xo bi raverşîyayîşê sîyasetê xo bîyê wayîrê para 2,7 mîlyar Dollaran a şîrketê asuransî Ping An Insurance. Tena para maya Wen Jîbaoyî naye de 120 mîlyon Dollarî ya.
