Samsung fûarê IFA de Androîd Tablet Galaxy dano zanayene. Di aşmeyan ra ver Samsungî qal kerdîbî ke şîrket plan keno komputura tabletî bivejo pîyase.
Enformasyonanê neweyan ra gore komputura tabletî bi ekrano 7 înç programê Flashî û sîstemê Androîd 2.2 ra gureyena. Xebitnayoxî besekenê ke telefonê vîdeoyî bikerê, vîdeoyî bi (ebe) formatê HD qayît bikerê û cayan bi GPS saye bikerê. Programê ke pê înan kitabî yenê wendene, raver ra yenê zereyê nê hacetî. Nuştiş bi sîstemê Swype -yanî klavyeyê ekranî- beno. Fîyatê na komputure hîna bellî nîyo. Peyê na komputere de kî yew (ju) kameraya bi 3,2 megapîkselî esta.
Tablet Galaxy 1024×600 û 100 hezar programê qijkekî yê xebitnayîşî (ci ra vanê “App”) xizmetê xebitnayoxî kenê. Samsungî yew vîdeoyê kilmî yê reklamî seba Tablet Galaxy musna:
Demo peyên de Apple iPad ra dime Samsung, Google û Toshîba kî pîyaseya komputeranê qijkek û barîyan de wazenê ke raver şêrê. Produktê Apple îPadî zaf namdar vejîyayê pîyase, feqet pisporanê teknîkî va ke henî bêqusur nîyê. Cinitişê formatê Flashî û xeylê programê bînî pîya nêgureyenê, cinitişê kameraya Înternetî kî qusurê iPadî bî.
Kam ke wazeno komputera tabletî biherîno, tenêna bivindo. Taybetmendîyê Apple iPadî henî rind nêbî û aşmeyanê ameyoxan de markayê bînî komputeranê nîyanênan vejenê. Çîyêde bînî kî no yo ke komputera tabletî seba xebitnayoxanê normalan henî rind nîya. Kam ke rayan ser gureyeno û makînêda qijkeke wazeno ke tey bibero, seba înan no tewir komputure îdeal o. La kay û Înternet hende rind ser o nêbeno. Aye ra kî dot nê teknolojîy hîna teze yê û aye ra her game de bêqusur nêgureyenê.
