Xebera Asia Timesî ra gore Rûsya be sîstemê dronkiştişî be nameyê Krasukha (Krasûxa) dronê Bayraktarî yê ke hetê Tirkîya ra ameyê viraştene, înan asan kena xirabin û ana war. Pê Krasukha, Rûsya mevkîyanê artêşa xo yê Sûrîye û Armenîstanî verba dronan nimneno û, eke lazim beno, kî sevekneno. Senî ke Krasukha şîkîno yew ca radarê dronan ra binimno, henî kî pagirêdayîşê înan ê GPS, yanî fonksîyonê dronan ê “raya çêyî dîyayîşî”, birneno. Nîya, GPSê dronan nêgureyeno û ê ginenê war. Nê semedî ra xeylê dronê Tirkîya yê ke kewtî, tede rêça roket û bombayan nênê dîyene. Nê dronî pêro raya sîstemê Krasukha ra ameyî warardene.

Bayraktar tewirê dronanê konvansîyonelan o ke seba dîyîşê hedefê xo GPS xebitneno. Sîstemê kameraya xo ya Wescam Kanada ra yeno, motorê xo yê bi 100 HE (hêzê estoran) BRP-Rotax kî Awusturya ra yeno. La na şîrkete kî girêdayeyê fîrmaya kanadayije Bombardier a. Nê di welatan hewteyo verên rotişê nê çekan be Tirkîya qedexe kerd, çike nê dronî duştê Armenîstanî de ameyê xebitnayene. Asia Times dewam ra nusneno ke tayê parçeyê dronan ê bînî kî Ewropa û DYA ra yenê.

CEWAB BIDE

Keremê xo ra şîroveyê xo binuse
Keremê xo ra nameyê xo binuse