Rojnameyanê Dêrsimî ju (yew) kombîyayîşêde bi şamî binê parolayê “Dêrsimijî yenê têlewe, qisey kenê” de viraşt. No pêserameyîş de wekilê BDP yê Dêrsimî Şerafettîn Halîs û sereka beledîya Edîbe Şahîn kî beşdar bîy.
Restaurantê Taksim Sütlimanî de xeylê karmendan ra pîya 100 dêrsimijî amey pêser. Şamî ra ra ver Şerafettîn Halîsî b tirkî vat ke “Wazenê Dêrsim bi dormegirewtiş hetê fethullahijan ra û pê polîtîkaya AKP ra teslîm bicêrê.” Boyna Halîsî va ke heto bîn ra kî partîya CHP no plan versîyonêde bîn de ceribneno. Bi Kiliçdarogluyî ke xo ra dêrsimij vano, labelê mîyanê CHP de xo înkar keno, towa (tebayê) nêvurîno. “Verê cû dewlete bi hêrişan ra dêrsimijî qir kerdî, no taw kî AKP dest erzena bawerîya dêrsimijan û henî înan qir kena. Gerek duştê naye de dêrsimijî pîya û ju (yew) bimanê.” Halîsî ra gore her ca ra yeno waştene ke îtîqad, zon (ziwan) û kultur, yanî rastîya Dêrsimî bêro xirabin kerdene.
Halîsî ra dime Edîbe Şahîn qiseykerdişê xo bi kirmanckî viraşt û xizmetê beledîyaya Dêrsimî ser o enformasyonî day. Şahin da zanayene ke wexto kilm de meydanê Seyîd Rizayî û heykelê Seyîd Rizayî ra teber xeylê projeyî seba cinîk û domanan viraştê. Şahîn xizmet ra qederî duşte awbendan, “xeripîyayîşê komelkî” û asîmlîasyonê Dêrsimî vindeto.
Pêserameyîş werdişê şamî ra tepîya herey reşt peynîye.
