Xebera rojnamayê îngilizî The Guardianî ke aşmê ra ver neşr bîbî, seba xebitnayoxanê Înternetî sey şok bî. Kesanê ke heta nika bawer kerdêne ke enformasyonê taybetî yê ke serê torranê sosyalan sey Facebook ya kî Twîtterî de vila benê, seveknaye yê, nika rastîya bîn a Înternetî vînenê.
Aktîvîstanê heqanê cuya taybetîye naye ver ra vatêne û îqaz kerdêne: Înternet çîyê xo vîr ra nêkeno û çîyo ke Înternet ser o neşr beno, mumkîn o ke merdim ey bivîno. Şîrketê çekan o amerîkayij Raytheon nika bi yew programê xo Riot musneno ke merdim bi rehetîye besekeno melumatan keyepelanê Facebook ya kî Twîtterî ra bitiro. No vîdeo aşma gucige de kewtîbî destê rojnameyê The Guardianî û YouTube ser o vejîya.
Yew tiknayîşê merre ra merdim besekeno melumatanê taybetîyan arê bido û heyatê ê kesan ke Facebook ûsn. xebitnenê, eşkera bikero. Raytheon vîdeoyê xo de bi nimûneyê karkerê xo Nîck naye musneno seyrkerdoxan. Tena nameyê hesabî lazim o, êyê bînî Rîot keno. Resim, adresî, enformasyonê taybetî û şexsî, her çî yeno dîyene.
Zafê xebitnayoxê teknolojîya newîye naye kî nêzanenê: kam ke telefonê destan ra resim anceno, no resim bi enformasyonanê nimiteyan darîno we: resim kot û key ame antene, otomatîk qeyd beno. Programê Rîotî kî nê melumatî eşkera keno. Ser o kî mesaj û torraqan yenê dîyene, serrname û aktîveteyanê xebitnayoxî/e zî. Keso ke wazeno yewna kesî teqib bikero, karê ey bi programê Rîotî zaf basît o.
Texmîn beno ke xeylê organîzasyonî bi destê Rîotî û programanê nîyanênan ra kewenê miletî dima, melumat arê danê û seba hedefanê xo yê ekonomîkan ya kî seba nîyetanê bînan program xebitnenê.
