Roja Cînîyan a Cîhanî ya 8. adare Dêrsim de kî ameye pîroz kerdene. Xeylê cayanê Dêrsimî ra bi hezaran dêrsimijî amey têlewe.

Bi munasebetê 8. adare ra Roja Cinîyan a Cîhanî hetê Platformê Cinîyanê Dêrsimî ra ameye organîze kerdene. Bi slogananê sey “Rosayan ra heta Sakîneyan raya şima raya ma, sozê şima kî sozê ma yo” û “Pê rêxistinbîyayîş ma sereyê xo darenîme we, bi serewedaritiş kî ser kewenîme” mîtîngî meydanê Seyîd Rizayî de ca girewt. Kombîyayîş de mayê Roboskî û teberê Dêrsimî ra xeylê cinî beşdar bî. Sûka Binharde û Meydanê Seyîd Rizayî de bi nûmayîş, govend û aktîveteyan cinîyan roja cinîyanê kedkaran bimbarek kerd.

Cinîyanê ke kincê gelêrî day xo ra û bi renganê keskûsûran meydanî kerdî pirr, hîrê aktvîstê kurdî ke Parîs de kişîyay, Sakîne Cansiz, Leyla Şaylemez û Fîdan Dogan, yad kerd. Partî û organîzasyonan ra kî sîyasetmedar û aktîvîstî  beşdarê mîtîngî bîy.

Meydanê Seyîd Rizayî ra beşdarî bi hezaran şîy mezela Sakîne Cansize het.