34 kesê ke 28. kanûne 2011 de dewa Roboskî ya Şirnexî de canê xo semedê operasyonê hewayî yê artêşa Tirkîya ra kerdîbî vîndî, ewro yad bîy. Pêro Kurdîstan û Tirkîya ra bi hezaran kesî seba yadkerdiş amey têlewe.

Hemserekê BDP Selahattîn Demîrtaş û Gultan Kişanak, hemserekê kanî yê DTK Ahmet Turk û Aysel Tugluk, parlamenterê bînî yê BDP, HDK, Mazlum-DER, Federasyonê Komelanê Dêrsimî, xeylê kesî û rêxistinî beşdarê yadkerdişî bîy. Destê saeta 10 de keyeyê qurbanan dewe de dest bi yadkerdiş kerd. Ahmet Turk û Selehattîn Demîrtaşî kî qisey kerd, şarî sloganî sey “Qetil Erdogan” eştî.

Turk va, “Bêrêne, ma pêro nê dejan veradîme û seba ke dejê neweyî mevejîyê, ma bi wijdan û însanîyetê xo ra hereket bikerîme. Ewro hesîrê mayan yew serre ra tepîye hîna rişînê. (…) Ma seba azadîya şarê kurdî mucadeleyo muşterek virazîme. Eke wayîrê wijdanî nîya bikerê, nê zîhnîyeto faşîst, înkarkar û nîjadperest do çin bibo. Ma faşîzm qedênîme. (…) Mucadeleyê ma rast o. Ez tîya ra venga Tirkîya û şarê kurdan kena, ma şarê çar parçeyanê Kurdîstanî rê mucadeleyo muşterek virazîme.”

28. kanûna 2011 de nêzdîyê sînorê Îraqî de 34 dewijî hetê artêşa tirke ameybî kiştene. Goreyê dayîşzanayîşê berpirsîyaran, dewijîî xeletîye ra, seba ke bombakerdoxan vatîbî qey “terorîst” ê, kişîyay. Yew serre ra dime hîna cigêrayîş û eşkerakerdişê serebûtan tam ca nêame.