Qirkerdişê Helebce serrgêra xo ya 25. de Kurdîstan û Tirkîya de hetê des hezaran ra protesto bî. 

Protestoyan de ke bi desan şaristanan de ca girewt, qetlîamê Helebce ke sey “Hîroşîmaya Kurdan” nas beno, bi sloganan sey “Ma Helebce xo vîr ra nêkerd, nêdanîme xo vîr ra kerdene!” yad bî. Goristanê Helebce ser o qurbanê qetlîamî amey yad kerdene. Şar sîyala û bi pankartanê sîyayan kewt şîn û şiware.

Di çalakîyê yadkerdişî estbîy: yewê hetê Hukmatê Herêma Kurdîstanî ra resmî organîze bîye. Tede Serekê Herême Neçîrvan Barzanî û cinîya serekkomarê Îraqî Celal Talabanî Hero Îbrahîm Ahmet, partîya BDP ra Ayla Akad, Mulkîye Bîrtane, Nazmî Gur, keyeyanê Roboskî ra û hîna bi seyan kesî beşdar bîy. Neçîrvan Barzanî qiseykerdişê xo de da zanayene ke 16. adare Kurdîstanê Başûrî de do sey roja qirkerdişî îlan bo.

Çalakîya dîyine zî hetê şar û partîyanê bînan ra ameye ogranîze kerdene. Na çalakîye goristanê şehîdanê Helebce ser o qewimîyaya. PÇDK, Tevgera Hemwelatiyên Azad û Yeksen, KNK û tayê rêxistinê bînî tede temsîl bîy, mesajê xo wendî. Qiseykerdişan ra dime grûba çalakîye goristan ra şîye cayê yadkerdişê resmî.

Serekê Hukmatê Herêma Federal a Kurdîstanî Mesûd Barzanî rojnameyê partîya xo de qetlîamê Helebce nîya ard ziwan: “Ma pêro deyndarê Helebce yîme. (…) Gerek hukmatê Îraq û Herêma Kurdîstanî pêro lebata xo seba dermankerdişê dirbetinanê varayîşê kîmya bixebitnê.”

16. adare 1988 de rejîmê Saddam Huseyînî şaristanê Kurdîstanî bi çekanê kîmyewîyan ra bomba kerd, sey netîce 5.000 kurdan canê xo day. Na hûmare kî hîna nizm a, tayê vanê mabênê 8.000 û 10.000 kesî kişîyay, hîna bis des hezaran bîy dirbetin. Îraq û tayê welatanê bînan ê Ewropa de ewro qirkerdişê Helebce sey jenosîd qebul bî.