Kirmancê ke terteleyê Dêrsimî yê 1938 de tirê Halvorî de amey kiştene, hewteyo verên amey yad kerdene. Sereka BDP Sebahat Tuncel cayê ke tede nêzdîyê hezar dêrsimijî ameybî qir kerdene, uca va ke “Qetilanê ke vizêr Dêrsim de, ewro kî Roboskî de însanî kiştê, ferqê înan çin o. Armancê înan yew o: Yew ziwan, yew dîn, yew ala.”

No yadkerdiş de bi hezaran dêrsimijî, wekila BDP Sebahat Tuncel û sereka beledîyaya Dêrsimî Edîbe Şahîn peyê pankartê “Terteleyê 1938 nalet kenîme” de beşdar bîy. Yew kokima kirmance bi duayê kirmanckî çila fişte ra ci, tepîya beşdaran payan ser o qurbanê qetlîamî yad kerdî.

Uca de nuştoxê rojnameyê Dêrsimî Huseyîn Ayrilmazî qisey kerd û va: “Ma tîya de seba kesê ke 1938 de amey kiştene, ameyîme têlewe. O wext dewijê ma kenê top, awanîya raye de danê gureyayene. O wext vanê ke ma medenîyet anîme, çekuya medenîyetî ra kî ray û pird fehm kenê. Dêrsimijî nîya gureyenê. Dima, dewijan ra vanê ke meydan de top bêrê, pereyî yenê vila kerdene. 350-400 karkerî yenê meydan ser, uca de hetê eskaran ra bi sungî yenê qetl kerdene. Înan ra tena yew cinîke weş manena, ê bînan kişenê. Na cinîke heta 1-2 serrî raver ra heyat de bîye. Çîyê ke uca de amey kerdene, yew qetlîam o. Ma no jenosîd xo vîr ra nêkenîme. “

Badê, wekila BDP Sebahat Tuncel qiseykerdişê xo de va ke se serrî yo ke na cografya bi zuran ameya ramitene û no xapênayîş hîna dewam beno. “Raver ra însanê ma amey qir kerdene û dime ra amey asîmîle kerdene. No semed ra ma nika vînenîme ke şarê ma eslê xo ra cêra bîyo.  Cewabo tewr rind duştê qirkerdişê 500 însanan de xovîrranêkerdiş o.”

Qiseykerdişan ra tepîya tirê Halvorî ra vîlikî amey eştene bi çemê Mizurî.