Qerarê Dezgehê Berzî yê Weçinitişî yê Tirkîya (YSK) ke 12 namzedê xoserî seba weçinitiş bêrê îptal kerdene, Tirkîya, Kurdîstan û Ewropa de ame rexne kerdene. Tayê cayanê Tirkîya de kî mîtîngê protestoyî amey viraştene.

Dêrsim, Dîyarbekir, Sêrt, Cîzre, Mêrdin, Mûş, Agirî, Îstanbul, Mersîn, Îzmîr û xeylê şaristananê bînan de qerarê YSK ke 12 namzedê xoserî, tede kî hewt BDPijî, mekuyê weçinitiş bi protestoyan ame rexne kerdene. Îstanbul, Îzmîr, Dîyarbekir, Silopî û Cîzre de protestoyî şidetin vêrdî ra. Pêrodayîş werteyê protestokerdox û polîsî vejîya, polîs bi panzer, gaz û awe duştê protestokerdoxan de vejîya. Dîyarbekir de kî ju (yew) kes hetê çekê polîsî ra bîyo dirbetin. Çalakîyê ke şaristananê Kurdîstanî de yenê viraştene, hetê namzed û parlamenterê BDP jê (sey) Sebahat Tuncel, Ufuk Uraş, Levent Tuzel, Sirri Surreyya Onder û Mustafa Avcî ra destek cênê. Xeylê partî û organîzasyonanê bînanê sîvîlan kî dest da protestoyan.

Namzedê BDP ê Mersînî Ertugrul Kurkçuyî kî da zanayene ke pê avûkatê xo ju (yew) waştişname rusna YSK ke qerarê înan îtîraz keno.

16 baroyê BDP pîya day zanayene ke qerarê îptalkerdişî welat de beno semedê kaos û şidet. Serekê baroyê Şirnexî Nuşîrevan Elçî ke beyanatê BDP wend, va: “No qerar ne şarê kurdî, ne şarê tirkî ne kî Ewropa rê yeno eşkera kerdene. Gerek no despotîzm ke parlamento û weçinitişê şarî de kay keno û tercîhê şarî muhîm nêceno, wedarîyo. (…) Gerek no qerar sîyasetkaran rê derse bo. No qerar ispato eşkera yê vesayetê eskerîye no welat ser o yo. Wedaritişê nê vesayetî tena bi pakkerdişê pêro rêçanê darbeyê 1980î beno – eke qanûno bingeyî, qanûnê weçinitişî û qanûnê partîyan bêrê vurnayene.”

Dêrsim de kî serekê BDP yê şaristanî Suat Demîrî pêserameyîş de ke Sûka Binharde de ca girewto, qisey kerd va ke bi no qerar yeno ceribnayene ke îradeyo sîyasî yê kurdan bêro şikitene. “Ê hevalê ke cezaya vetoyî werde, qet manîya înana huqûqî çin a. No komployêde sîyasî yo, eke no bêro eşkera kerdene kî tede zaf risk esto. Nîya virênîye ro sîyasetê kurdan yeno girewtene.” Qiseyerdkişê Demîrî ra tepîya sereka beledîya Edîbe Şahînî ra pîya protestokerdoxî şîy verê banê (bonê) AKP û uca (uza) çalakîya roniştişî viraşte.

Partîya sosyalîst a Fransa kî qerarê YSK rexne kerd, sekreterêde partî naye ser o va ke “Ju (yew) welato ke wazeno bibo endamê Yewîya Ewropa, gerek bi rastî hurmet ro şertanê demokrasî bimusno.”

4 ŞÎROVEYÎ

  1. BDP iz hona heredine vane ke no chi huquko? Rojrost birayene, hevalene, embazene. Sima hona cutir na huquk re dewlete re bawer kene. 2.000 siyasetbaze sima zeredere, perwerdiye domenu qedexeyo, statuye kurdiye siyasi qe china. Asimilasyona kultur, ekonomi, siyaset u itiqat dewam keno. Reflekse kurdi hona seba esqe parlamentoye tirkuno. 25 milyon sar cutir 30-40 wekil ra beno raji. Dinya de numuneye niyanen chino. 

Comments are closed.