Pisporanê qenserî da zanayene ke zereyê 20 serran de Ewropa de girewtişê nêweşîya qenserê cîldî, ci ra kî qenserê cîldî yo sipî vanê, leze beno zêde.
Labelê xeylê kesî hîna bê kremê seveknayîşî xo şanenê tîje ver û rîzîkoyê vejîyayîşê qenserê cildî kenê berz. Bitaybetî merdimê (mordemê) ke 60-80 serre der ê, gerek xo tîje ra rind biseveknê. Heto bîn ra studyoyê tîje, yanî solaryum, rîzîkoyê vejîyayîşê qenserê cîldî yê sipî -bitaybetî înan de ke mabênê 30-40 serre der ê- keno berz. Ferqê qenserê cîldî yê sipî û êyê sîya o yo ke cîldê însanî de beno vila, xaseten rî û vile (mil) û destan de.
Mesela tena Almanya de her serre 240.000 kesî na nêweşîye cênê. Heta ke qenser ra tumor yeno pêra, xeylê serrî vêrenê ra. Girewtişê qenserê cîldî yê sipî ra tepîya emelîyat mecburî yo. Çiqas ke qenser rew yeno dîyene, hende kî weşekerdişo serkote (serkewte) mumkin o.
