Dêrsim de hetê ra operasyonê artêşa tirke bîyê zêde, heto bîn ra kî kampanyaya weçînitiş de namzedê partîya BDP yenê tersnayene. Enformasyonê rojnameyanê Tirkîya ra gore qumandarîya Çemîşgezekî qorîcîyan rê emr da ke “Gerek şima payanê Ferhat Tunçî bişiknê!” Bi na stratejî eskerîya Tirkîya namzedanê BDP tersnena ke kampanyaya xo ra bitexilîyê.

Vatena şarê Dêrsimî ra gore bi no tehdîd jê (sey) serranê 1990an de yeno waştene ke şarê Dêrsimî bêro tersnayene ke ê kesê seba heqê zon (ziwan) û kulturê Dêrsimî sîyaset kenê zêde ray mecêrê. Heta nika namzedanê CHP û AKP kampanyaya xo de çetinîye nêante (nêonte).

Namzedo xoser ê BDP Ferhat Tunç duştê nê tehdîdî de no hewte şî Çemîşgezek û veng da va: “Sereyê (sareyê) ma ke bişiknê, ma ancîya (onca) şarê xo yenîme pêser. Ê se kenê wa bikerê, se vanê wa vajê, ma dewam kenîme ke şarê xo zîyaret bikerîme. Însanê nê cayan wayîrê kultur, bawerî û nasnameyêde muşterek ê. No sîstemo zureker se serran ra ceribneno ke bi polîtîkaya xo ma jubînî (yewbînan) dûrî bifîyo.

Ferhat Tunçî Çemîşgezek de xeylê dewî zîyaret kerdî. Nê dewan de projeyê xo derheqê cengê 30 serranê peyênan, terteleyê Dêrsimî, persa kurdan û elewîyan de da nas kerdene. Tunçî uca (uza) îlan kerd ke parlamento de wekîlê dewlete ney, wekîlê şarî beno. “Ma ke nika ameyîme nê dewan, peyê ma de her saete erebeyê sîvîlî ma teqîb kenê. Ma ke şonîme kamcîn dewe, ê kî ma dima yenê. Gerek ma a zîncîra ke înan arde dewijanê ma ser de, bişiknê. Êndî gerek ke nê ajanî tersan ra bilerzê, wexto ke ma vînenê. Ma JÎTEM ra nêtersenîme. Çike ma hardê (erdê) baw û kalikanê xo ser o azad nîyîme, gerek ma naye rê pêro dîme.”

Ferhat Tunç ju (yew) dewa Çemîşgezekî de kot ra û va ke ey rê ke çîyê bibo, mesulîyet qumandarîya Çemîşgezekî der o.

 

1 ŞÎROVE

  1. KUTIK BIZONE KE INU SEY RIZAY ESTI DAR, HONDE SARE MA KIST, HAMA KOKE INU LEZ DANO NIKA. FERHAT RAYE SEYIT RIZAY RA SONO. PORE EY RE KE DAE BIBO, NA DINYA NA KOZMOS RIZNEME MEZGE INU SER. ENDI JE TERE VIJER SARE MA NITERSENO.

    HÜSEYIN AYGÜN YAKI QEMER CENC BIZONEKE BI KUTISE CHP ASTE SEY RIZAY DEZNEY. PARTIYA KE PIRE MA EST E DAR, SIYE KUTE A PARTIYE. AR BIKERE AR!!!!

Comments are closed.