Serekkomarê DYA Barack Obamayî Sarayê Sipî de verê çapemenîya dinya de kerd eşkera ke artêşa hewayî yê DYA duştê terorîstanê Dewleta Îslamî (DÎ) de kewena herb.
Obamayî no derheq de va “Ewro Amerîka yena ardim.” Nê qerarî ra DYA ceribnenê ke virênîye ro raverşîyayîşê çeteyanê îslamîstan bicêrê û nîya qetlîamê duştê kurdanê êzîdîya de bivindarnê. Ancîya, qiseykerdişê xo de Obamayî emrê “hedefan ra gore hêrişan” da. Eke hemwelatî û elemanê DYA binê tehluke der ê ya kî terorîstî nêzdîyê Herêma Kurdîstanî, bitaybetî Hewlêr, benê, jetanê DYA rê destûrê bombardumanî esto.
Melumatan ra gore hêrişê jetanê cengî qijkek la bi îhtîmam bîy. Hêzê pêşmergeyî hêrişê bînî pawenê. Goreyê sekreterê çapemenî yê Pentagonî Admîral John Kîrby ra, “Di teyarayanê F/A-18 bombayê lazerinî yê 500 pound (226kg) serê topanê seyaran ê DÎ nêzdîyê Hewlêrî de eştî. DÎ nê topan duştê hêzanê kurdan de ke Hewlêr seveknenê, xebitnena.” Cayê ke amey piro dayene, Naynewe, Gwer û Maxmûr de bîy.
Ney ra kî dot Amerîka vizêr dormeyê koyê Şengalî de bi helîkopter û teyarayan werd û şimitiş da vila kerdene. Serekkomar Obamayî no derheq de va ke bi na game dormeyê qetlîamî yeno girewtene û qiseykerdişê xo de endamê DÎ sey barbaran name kerd.
