Wendoxa delale, wendoxo delal,

ewro roşanê pîroz ê şarê ma yo. Newroza bimbareke ameye verê çêberê (keyberê) ma, şen û şenatîye, eşq û keyf, weşî û warîye benê vila ko û waranê welatî ser de. Xirabîye ke şêro, rindîye ke bêro, şarê ma binê roştîya xo de a roja xo bimbarek bikero.

Verê cû, wextê ke welat de newroze pîroz kerdêne, kilam-milamî vatêne. Heval, heval kata şî? Hetê warê Heqî ro şî... Ewro ma besekenîme ke na kilame zonê (ziwanê) xo ser o vajîme. Heval, heval kata şî? Par ra heta ewro zonê (ziwanê) ma, kirmanckî (zazakî), binê tehluke de bîyo. Ma û xeylê kurdperwerê bînê hêcayî ser o gureyayîme ke no durum êndî bivurîyo. Her kes qewet û destebera xo ra gore lebitîya û çi ke ameyo ma ver de, ma duştê dişmenê xoyo tewr girs -vîndîbîyayene- de çok ronêna. Ma vanîme, heta nika ma pêrune rind mucadele kerd. Herçiqas ke karê ma hîna nêqedîya, ewro roja wareşîyayîşî (arisîyayîşî) ya. Ewro ma ne peyser ne kî raver nîyadanîme, ma ewro sirf ewro rê yîme. Newroze ewro der a.

Ju (yew) manaya newroze kî newekerdiş o. Kincê kanî bivejê bierzê, êyê tezeyan pay bikerê. Jê (Sey) teyrê Fenîksî postê xo yê kanî bivejê û wela adirê xo ra newe ra bêrê dinya. Kirmanckî no taw newe ra wela adirê xo ra yena dinya. Geşkerdişê zonî (ziwanî) wezîfeyê ma pêrune yo. Newroze kî beno vengdayîş û pîrozkerdişê nê prosesî. Bi munasebetê nê roşanê ma yê kirmancan redaksîyonê ma kî emser karê xo binê xizmetê şar û kulturê xo de ramito û adirê newroze ju (yew) roje keyepelê ma de kî keno vila. Nuştoxê mayê delalî her juyê (yewer) ju (yew) nuşteyê xo pêşkêşê wendoxanê ma kenê ke şima şikînê bi keyf û şayîye biwanê. Efsane, mana û tefsîranê newroze ser o ma fikrê cîya-cîyayî ardî pêser. Nîya mozaîkêde rindek ê newroza bimbareke yeno viraştene ke hem heyat û heterojenîya ma yê kurdan temsîl keno, hem kî roşanê newroze bi hîs û vînayîşanê cîya-cîyayan neqeşneno.

Destê nuştoxanê ma tern bê. Seke vanê, lejê kirmancan û kirmanckî ewro lejêde merdene ya kî menden a. Labelê ewro êndî kurdî kesî ver de sereyê xo ronênanê. Çiqas ke newroze ciwîyayîşo raver ê kurdan o, ewro kî şarê kirmancan bi ziwanê xo yê hezar serran waştişê azadîya xo rê qîreno.

Ewro keso ke pers bikero zonê (ziwanê) ma kotî yo, eceba bîyo vîndî, merdo, weş o, çik o, gerek şima bivajê ke “Zonê (ziwanê) ma jê (sey) adirê newroze veşeno.” Ewro keso ke pers bikero “Heval, heval kata şî?” gerek şima bivajê “Cayê nêşî, cayê xo de giran-giran kot ra we”.

Bi nê vateyan, newroza şima pîroz bo.

Şima bimanê weşîye de,

Redaksîyonê DêrsimInfoyî.

3 ŞÎROVEYÎ

  1. Newroza sima, nustoxî simaye delal u sare ma pörinere bimbarek bo, pîroz bo. Xeyre welatperwerî ziwane ma nino vindbiyayis, her kes ney niya rind bizono.

  2. Rosane Newroz sare kurdan re piroz bo, tekosina xoserbiyayene piroz bo. Sare dina re hastiye u birayene biyaro.

CEWAB BIDE

Keremê xo ra şîroveyê xo binuse
Keremê xo ra nameyê xo binuse