Bi coş û ruhê adirê newroze her kes rê merhaba.
Serê hardanê na dinya ra qet kesî qasê miletê kurdan zulm nêdî. Qet kesî qasê miletê kurdan feqirîye û hesîrîye nêdîye. Qet kesî qasê miletê kurdan belengazî û bêkesîye nêdîye. Qet kesî qasê miletê kurdan zor û zordarîye nêdîye. Yanî zaf nêheqîyênî ro ci ameya kerdene û hona-hona kî na nêheqîyênî kurdan ser o dewam kena. Herçiqas ke na nêheqîyênî û no zulm dewam bikerone kî, rojê nê zulmkarî adirê aştîye de, adirê azadîye de û adirê newroze de veşenê. Wa ey nîya dimê xo de. No dewran înan rê kî nêmaneno. Ewro êndî kurdî kesî ver de sereyê xo ronênanê. Xizirê Kalî ra dot, kesî ra kî êndî minete nêkenê. No adirê newroz o ke hetê Mazlum Doganî ra amo tafîştene, êndî pîyê qiral Dehakî bêrone kî nêşikîno no adir bişayno.
Seke zanîno, mîlat ra ver serranê 612îne de Mezopotamya û Rojhelato Mîyanên binê hukmê Qiral Dehakî de bîyê. Dehak, hukmdarêde xedar û zulmkar bîyo. Bi zulmkarîyênîya xo kurdan û şarê bînî ser o gelê hukm kerdo. Kurdan verba nê zulmî û na nêheqênî sere dardo we. Bi xoverdayîş û têkoşîna şarê kurdan peynîya îqtîdarê zulmkar Dehakî yena. No semed ra kî roja 21. adare de roşanê newroze werteyê kurdan û şarê rojhelatê mîyanênî de bi coş û heyecanêde gird yena firaz û bimbarek kerdene. Na roje roja yewbîyena kurdan a. Newroze kulturê şarê kurdan de cayêde taybetî cêna. 21. adare bindestê zulmkaran ra raxelesîyayene û azadîya kurdan a.
Ewro adirê newroze ke bi kilêda gure veşeno, no kî sayeya serê na têkoşîna ke bi fedakarênî ameya dayene, sayeya serê naye ra veşeno. Adirê newroze sembolê aştîye û azadî yo, sembolê roştî yo. No sebeb ra kî newroze roja azadî ya, roja serbestî ya, roja aştî ya, roja xoverdayîşî ya, roja têkoşîn a, roja yewbîyen a, roja coş û şahî ya, roja coşê govenda xort û azeban a. Newroze yena manaya “roja newîye” kî. Yan kî destpêkerdîşê serra newî yo, ameyîşê demê wisarî yo, rengê gul û çîçegan o, vengê awanê çem û çungan o, vengê Firatî, vengê Miradî, vengê Dîcle û vengê Mizurî yo. Hetanî ke awa Mizurî zelal-zelal, giran-giran bîye derge û welatan ser şîye, qet bêguman adirê newroze kî ebedî veşeno.
Hetanî ke adirê newroze ebedî û serbest veşa, fîrazkerdena newroze kî kurdan mîyan de nîya bi coş û heyecanê govenda xort û azeban, bi şewlê adirê gurî, bi rengê kesk, sûr û zerdî şarê kurdî mîyan de yena firaz kerdene. Na meşala newroze caran nêşorone xo ra û wa raya hêvî rê, raya aştî û azadîye rê hertim roştî bo!
Bi kilmek, newroze verba zulm û asîmîlasîyon de, verba îmha û înkarkerdiş de, verba komkiştene û zordarîye de, verba nêheqîyênî û bêadaletênî de, verba dişmenê zalimî de zê çêperî vindeten a.
Roşana şima ya newroze firaze bo!
Cejna newroza we pîroz be!
Newroz bayramınız kutlu olsun!
Bi tayna adirê newroze bimanê weşîye de û bi na şîîra xo kî adirê newroze fîna ta.
Adirê newroze biveşo koyanê ma de
Aştî û azadîyê rê yakerê kêberan
dest bide destî, vinde verba herbî,
kezeba mayan letê mebo!
bes o, êndî meberbê mayî, meberbê
adirê aştîyê, adirê azadîye
Adirê newroze biveşo koyanê ma de
bi sûra vayî gur bo adirê newroze
sey aşma newîye, sey astaranê şewe
roşt û şewlê xo bido welatan,
bido deşt û koyan.
boya tar û turî, boya gul û sosinan bêro
boya barutî nêrone koyanê ma ra
vengê selxî û malî, vengê teyr û turî,
vengê pepûkê wisarî, vengê xort û azeban,
vengê aştî û azadîyê berz bo koyanê ma ra
sey çem bizîngo welat bi welat bicêro
vengê qerqeşunan û bomban nêrone koyanê ma ra
vengê vayê başûrî, vengê awa çeman
vengê bulura şuyanî berz bo nê koyanê ma ra
vengê merdene, vengê berbişe mayan,
mêronê koyanê ma ra
wa adirê newroze biveşo koyanê ma de.
Wusênê Gestemerde
