Reya verêne amerîkayijan şaristanê New Yorkî de kuça Wall Streetî verê dayîreyê borsa de duştê feqirîye, mesrefê cengî, rişwet, zêdexerckerdiş û hêzdarîya borsa de protesto kerd. Polîsî esnaya protestoyî de 700 kesî pêgirewtî.
Nêzdîyê 1.500 kesî şodir ra serê pirdê Brooklynî de ameybî pêser û nêvarda ke erebeyî uca (uza) ra bivîyarê. Hîrê saetan ra tepîya polîsî besekerd ke pird bicêro (bigiro) binê kontrolê xo. 1.500 protestokerdoxan waşt ke no aksîyon ra bala medya û fikrêumûmîya têduştnêbîyayîşo komelkî, rotişê zorakî yê banan (bonan) hetê bankayan ra, bêkarîya berze û sîyaseto werdox ê fînansî yê hukmatî ser o bianco (bionco). Medya û xeylê turîstan protesto nêzdî ra teqib kerd. Hewteyê ra ver kî 80 kesî beşdarê nê protestoyî bîy.
New York ra teber DYA de kî şaristananê Boston û Los Angelesî de çalakîyan ca girewto. Boston de 3.000 kesan marşê protestoyî de rotişê zorakî yê banan (bonan) rexne kerd. Çar serrî yo ke DYA de bi mîlyonan banî (bonî) hetê bankayan ra bi zor ra yenê rotene, çike wayîrê banan (bonan) krîzê fînansî ra tepîya besenêkenê ke deynê xo bidê. Hetê ra kî rêja bêkarîye bena zêdîye.
