Futbolbazo kurd ê ekîbê almanî Bayer Leverkusen Eren Derdîyokî no hewteyo peyên de golêde rindek eşt. Şîrovekerdoxanê sporî nika ra kerd eşkera ke no gol golo tewr rindek ê sezonî yo. Xeylê rojnameyanê alman û swîsijan derheqê nê golî de nuşt. Golê futbolbazê dêrsimijî kî televîzyonê Ewropa û keyepelanê Înternetî de zaf-zaf bîyo vila.
Duştê ekîbê Wolfsburgî de Eren Derdîyokî bi linga raste rovaşata kerde nîya gol eşto. Maç seba Leverkusen bi 3-1 qedîya. Derdîyokî bi xo hîsê xo nîya tarîf kerd: “No gol, ez henî vana ke, golo tewr rindek ê karîyerê min ê sporî yo. Merdim (mordem) besenêkeno ke her wext golêde nîyanên bierzo.”
Xeylê pisporê sporî anê ra zon (ziwan) ke Derdîyok estarêda girs a futbolî ya. Eren Derdîyok bi eslê xo Dêrsim ra yo. May û pîyê xo Swîs de nişenê ro.
